Nagaland-ia Dr. Abdul Kalam mang ayimer

Dimapur, July 27 (TYO) : Tanü nikongtsütsü Shillong nung Dr. A.P.J. Abdul Kalam asüba osang angashia kanga aoksar aser mang ayimer ta Nagaland Chief minister, T.R. Zeliang-i sangdong ka nung metetdaktsü.
Nagaland nung alirtemi Dr. Kalam-i Nagaland semdangba aser Naga nunger dang temeim sayuba menungra bilemteter. Missile Man of India dang masü saka Peoples’ President ta ajar mongin nisung ka iba akümli toktsür aoba atema Nagaland-i mangyimer ajak den asüku lemsateper, ta T.R. Zeliang-isa metetdaktsü.
Pai India atema mapa tajung inyakba kodanga mamatsü aser Chief minister-i anir Nagaland nung alir ajaki linük den külemi India asoshi konang-nüngsang bener arutsür tushir, ta paisa shisem.