Nagaland In-Service Doctors’ Association lokti senden agi

Kohima, Aami/June 28 (TYO): Tanü Capital Convention Centre, Kohima nung Nagaland In-Service Doctors’ Association (NIDA) lokti senden tetenzük sentong nung jembidang Health & Family Welfare Minister, S. Pangnyu Phom-i, meimchir tenzükba wadang nendaka inyaktsüla, teladak asütsüla aser khuret agia inyaktsüla, ta ayongzük.
Minister, Pangnyu-isa, Department nung Program Officers-i state kübok kanga tezülen aliba tesemtem nung posting ata-a alirtem asoshi bilemja inyaktsü ajungshi.
Minister-i sentong nung benokba Service Rule junga benshitsü atema ayongzükba den külemi pai Department ajungtsü atema inyaktsü, aser iba atemaji Doctor tem aser Department ketdangsertemi amalitepa yaritepdaktsüner, ta mepishia metetdaktsü.
Kasa sentong nungsa Commissioner & Secretary, DoH&FW, Nagaland, I.Himato Zhimomi-i züngsemtem dang ano asentenshir nendaka inyaktsü, pei asoshi mebilemi inyaktsü aser timtem balala liaka meimchir tenzükba wadang nung mapang indoktsü ayongzük.
Tayongzükba o jembidang Principal Director, DoH&FW, Dr. Meguosielie Kire-i züngsemtem dang iba ama tentet nung yakyaka shilem agitsü mepishiba den külemi Service Rule tasenba yanglushiba nung meranga inyakba atema pelaba lemsatep.
“Service Rule tasenba ya ajanga state nung Doctor ajak nem kasa maongka agutsütsü,” ta Kire-i metetdaktsü.
NIDA Tir teinyakdak, Dr. Khriezotuo Paphino-i Department indang Service Rule tasenba indang metetdaktsü; iba ya NIDA züngsem ajak nem kasa maongka agutsütsü nükjidong yur yanglushiogo, ta pai ashi.
Dr. Khriezotuo-isa züngsemtem dang NIDA omen “Service to Humanity” atangji nung ataloka inyaktettsü atema pei wadang kanga nendaka inyaktsü ayongzük.
NIDA tongti tezülur, Dr. Imotemsu-i 2017 küm Luchii/December ita nung GBM mapang telemtetbatem mapa küma inyakba osang agutsü aser NIDA senyur, Dr. Joel Koza-i NIDA senotsü osang metetdaktsü.
Züngsemtemisa taküm asür züngsemtem bilemteta minute ka shi mokremer akhüm agüja liasü.
Tang tasen shimba NIDA Executives temji- Tir, Dr.Ritu Thur, tatong Tir, Dr.Akum Jamir, Secretary- Dr.Ahu Sekhose, Gen.Secy.- Dr.John Kemp, Jt. Secy.- Dr.Khelito, Treasurer- Dr.Neisakho, Advisors- Dr.Khriezotuo Paphino, Dr.Akuo Sorhie aser Dr.Kikameren Longkumer nunger lir.
Tetenzük sentong ya NIDA Secretary, Dr.Vibeituonuo Mepfuo leniba nung agi aser Jt.Secretary,NIDA, Dr. Obangjungla tepela anküp o jembia liasü.
Iba sülen taoba mapang GBM bangzüng, Nagaland Medical College updates, Cadre Review & Health Unit Categorisation aser NIDA Executives tasenpur election onüktem nung o lemtepa liasü.