Nagaland indang ‘Cultural Heritage’ shisatokden agir

Kohima, September 29 (TYO) : Kohima Science College (KSC) Jotsoma nung anogo ananü ‘Cultural heritage of Nagaland’ national seminar tenzükogo.
Iba sentong ya department of Anthropology KSC-i Indira Gandhi Rashtriya Manav Sangrahalaya (IGRMS) den yaritepa ayongzük.
Iba shisatokden aliba indang okila jembidang KSC principal, Dr. I. Anungla Aier-i ashiba agi Naga nunger sobaliba ajungkettsü atema iba sentong ayongzüka agir.
National Museum kübok academic advisory committee-i tawa tu North east state tem indang sobaliba ajungkettsü atema shisatoktentem alitsü telemtetba agi, ta IGRMS Bhopal Director, Prof. Sarit Kumar Chaudhuri-i tanü ashi.
Iba nung ajemdaker Guwahati University aser Sikkim University nung kasa shisatokten sentong agiogo aser tang Kohima Science College (Autonomous) nung agir, ta Prof. Sarit-isa shisem.
IGRMS ya India nung ‘new museum movement’ lir aser lokti dak rangloker lapokba museum ajungkettsü atema mapa inyaker. IGRMS-i akhidang nungi sobaliba balala tsüngda tesentaktep yanglua arur aser Northeast nung lisopurtem dak temulung agüja linük nung sobaliba ajungkettsü nükjidong lir, ta Prof. Sarit-isa metetdaktsü.
Nagaland State Women Commission chairperson, Dr. Temsula-i onük nung ajemdaker jembidang ashiba agi, “Nagaland nung sobaliba tsütsü sendakba mapa nung mongin nisungtem aser tanüngba nübortem ajak asoshi tebilemtsü khuret lir, kechiyong Naga nungertemi tetsü-tebou nunger sobaliba den talangka pilaogo aser putu 21 buba nung alima inyakyim sülen anidaker. Mapang süia aodang sobaliba nung tagitsütem samaa aotsü.”