Nagaland indang ‘road maintenance policy’ yanglutsü : Vikheho Swu

Pughoboto, October 29 (TYO) : Honibarnü PWD (R&B) Minister, Y Vikheho Swu-i Satakha-Chishilimi lenmang nung kanga dang nüngdaka aliba Bailey Bridge lapoktsüogo.
Iba apu ya Zunheboto district kübok Pughoboto sub-division nung Khucho ayongma nung feet 60 shi tasazük lir.
Tanü apu lapoktsüba sentong nung jembidang Swu-i ashiba agi, department inyakyim nung temelenshi bener arutsü aser talisa ibaji nübo lemzükba inyakyim nung lir.
Taruba küm ka tsüngda superintendent engineers mapa lemzüktsüba aser labour management dak sendakba maparen tembangtsü aser iba sülen department nung aayangertem itasen angutsü aser parnoki inyakba mapa mita reprangtsü, ta paisa shisem.
Nagaland state nung kümshia gari lenmang anepalutsü atema sen crore 300 nüngdaker saka tang küm nung sen crore 40 dang agütsür. Iba jagi gari lenmangtem anepalu mesüteter, ajisüaka sangküm tashi nung Nagaland Road Maintenance policy yanglutsü aser iba sülen jibo gari lenmangtem tajungba akümtsü, ta PWD (R&B) Minister-isa metetdaktsü.
Paisa, Pughoboto Sub-division nung PWD (R&B) Executive Engineer office ka lapoktsü aser ibaji State Cabinet-i mulunga agizüba ama November 16 nü lapoktsü, ta tanü osang metetdaktsü.
Centre-i highways 5 sangdongogo aser ano 5 sangdongtsü atema mulunga agizükogo. Iba nung Showuba-Niuland- Ghatashi-Pughoboto-Zunheboto-Shamatore-Pangsha highway kobi melii yanglu tenzüktsü, ta paisa shisem.
Tesüiba küm ishika Nagaland nung terenlok mali ta public-i sorkar aija jembiba atema olen ka ashidang, “Centre sorkari 2014 küm Nagaland nungi ‘special category status’ agienba sülen nungi timtema arur, kechiyong iba ya ajanga Centre nungi special funding agütsüba nokdang,” ta Swu-isa ashi.
Iba khuret asoshi asen state-i revenue angutsüla aser ibaji atema public-i sorkar nem electricity, tzü aser tanga bill tem menokba den sarutem agütsütsüla. Ibaji asü nungdang terenlok mapa timi inyaktettsü.
Public-i sorkar indang ketdangsübaren angatettsüla. Tesüiba sorkar aliba mapang parnoki sen aika apuba ajanga sentsüh aika tsühlok saka tang T.R Zeliang-i aniba sorkari sen mapuidang taoba sentsühtem odoktsü atema meranger, ta Minister-isa shisem.
Tanü sentong nung mendenji SE-II Limanaro liasü, Chisholimi Baptist Church Pastor, Rev Heniton Sheqi-i temoatsü meshia sarasadem aser EE PWD (R&B) H. Tokavi Chishi-i anküp tepela o jembi.