Nagaland ji kodanga India kübok maliasü: Adinno Phizo

Chedema, May 16 (TYO): Tanü Kohima anasa yangi Chedema Peace Hall nung Naga National Council (NNC)-i 65buba Naga Plebiscite mungogo.
Iba sentong nung jembidang NNC Tir, Adinno Phizo-i, “Küm 65 tejaklen May 16 nü linük tesem ajak nungi Naga nunger nisung 6,000 dak tema kuli asütsü aser parnoki asen linük atema tezüngzüktep agitsü asoshi Kohima-i aru. Ibaji ajanga 1951 küm May 16 anepdang 10:00 ako nung Voluntary Plebiscite tenzük,” ta metetdaktsü.
“Tulu süaka tila süaka linük kaji linük. Saka kodang ner kidanger linüki nenok alibaji mezüngshilir, lenmang shitakbaji raratsü masü saka mapa agi sayutsüla. Iba kuli ajanga A.Z Phizo leniba kübok Naga National Council (NNC)-i Naga nunger atema Naga nunger Voluntary Plebiscite agitsü asoshi lemtet. Iba atema pai ita pezü tashi tetsüng agi linük tesem ajak sema senzü aser nüburtem dang iba tensaji rasa-a ashi. Naga nungeri pei linük meimbayong parnoki pei temetenji melamela angatet. Plebiscite nungji lenmang ana agütsü- nüjiso mesüra India den adentsü. Shilem 99.9-i nüjiso süa alitsü nangzük, ibaji matalokdang ita pezü lia NNC-i India sorkar nem-a metetdaktsü. Iba Plebiscite osang ajanga Naga nungeri alima dang parnokji khenyongi linük balaka ta sayu. Sobaliba yimya nung Naga nungeri tezüngzüktep agibaji kanga süoki ia agir,” ta Adinno-isa metetdaktsü.
Laisa, “Iba Plebiscite ya, Nagaland ji India shilem ka akümtsü asü masü, ta asüba indang masü. Iba ya India aser alima dang Naga nunger linük ka ama telongjem aliba sayutsü aser India nem Nagaland jenjang metetdaktsütsü atema lir,” ta ashi.
“Naga nungeri India dang nungi kecha memeshir. Nagaland ji India shilem ka maliasü aser kodanga yamaji masütsü. Iba den külemi Nagaland ji India tsükchir ka masü. Naga nungeri India dang imlabaji, shisadangtsüla aser Nagaland aser India tsüngda yimjung alitsüla,” ta Adinno-i ashi.
Taoba mapang FGN Chaplain, Rev. Yankey Patton aser Rev. Majabong natia Plebiscite agiba indang lemsatep.
Tanü sentong nung Plebiscite agütsür nisung 55 aden aser parnok nem nüngo ka ka agütsü.
1951 Plebiscite tezüngzüktep agirtem nem salem agüja Angami Youth Organization Tir, Medo Yhokha-i “Onoki nenok nem salem agütsür. Onoki nenok nem akhüm agütsür,” ta ashi. “Iba Plebiscite atema onok ambassador asütsü,” ta paisa ashi.
Iba sentong ya NNC, CEC züngsem Kolezo Chase leniba nung agi, Sumi Baptist Church Kohima, Pastor Rev. Dr. Hokheto Chophi-i sarasadem aser Konyak Baptist Church youth Kohima aser Phom Baptist Church youth Kohima-i ken atena aser NNC tatong Tir, B. Pashen-i tepela anküp  o jembiba sülen lokti sarasedama sentong tembang.