Nagaland ketdangsertemi Maharana Club aser Cotton University semdang

Dimapur, Yimpoksüi (November) 9 (TYO): Youth Resources & Sports (YRS), Information & Public Relations (IPR) department tem nung ketdangsertem den Nagaland Football Association (NFA) züngsemtemi November 9 nü Guwahati nung aliba Maharana Club aser Cotton University semdang.
Nagaland kübok Changki yimer Dr. T. Ao küm 100 ajungba tenüng nung Nagaland sorkari küm piyong benjung munga aruba nung shilem ka ama Guwahati semdang.
Dr. T. Ao ya Nagaland nungi mezüngbuba Olympian liasü aser 1948 küm Summer London Olympics Games nung pa Indian Football Team nung captain liasü.
Maharana Club nung ketdangsertem aser Cotton University nung faculty züngsemtem den ajurutepa sensaksemtsü atema Nagaland nungi teshimtet telokji ao. Dr T. Ao ya Cotton University nung azüng aser Maharana Club nungi football asaya.
Nagaland nungi aoertemi tanü sensaksemdang Nagaland sorkari Dr. T. Ao nem tetushi agüja küm piyong sentong balala mungyonga aruba osang metetdaktsü.
January 28, 2019 nü Kohima nung iba benjung tembangtsü anungji iba sentong nung ara adentsü pelashishi jaoker, ta parnokisa ashi.
Maharana Athletics Club President, Rana Pratap Bordoloi-i o jembidang Nagaland nungi ketdangsertemi club semdangba atema pelaba metetdaktsü aser sangküm benjung tembangba sentong nung pa adentsü ta nangzük.
Dr. T. Ao lenisüba kübok India ajungalen club meteta aser nüngtugu aküm. Dr. T. Ao-i linük kübok asayamung balala nung Club tenüng nung asaya aser takok aika bentsür aru aser club-i pa teti bilemteter, ta paisa shisem.
Cotton University Vice Chancellor, Professor, BC Goswami-ia o jembidang Dr. T. Ao-i University atema dang masü saka linük atema mapa tulu inyaktsü ta ashi.
“Asenok tar tatsü saka sempet aika keta lir. China aser Korea nungeri inyaktetra, asenoki kodaser meinyaktettsü?” ta Goswami-isa ashi.
“Asenoki training tajung aser infrastructure agütsütsü nüngdaker” ta paisa shisem.
India nüjiso mangudang Assam nung college ana dang liasü, Murari Chand College, Sylhet (tangbo Bangladesh) aser Cotton College, Guwahati. Küm shia college ana tsüngda football asaya saka küm 14 tashi MC College-i dang takok nguyonga aru. Ajisüaka, Dr. T.Ao-i college team nung captain inyaktsü tenzükba sülen onoki takok angutsü tenzük, iba ajanga Cotton College pur ajungmeso aser tanü tashi onoki pa bilemteter, ta Goswami-i ashi.
Cotton College nung indoor stadium tajung ka yanglutsü sentong lir aser iba stadium tasen dang Dr. T. Ao Indoor stadium ta ajatsü anungji Nagaland sorkaria iba mapa lemsar inyaktsü atema bilemdangtsü mepishir, ta Vice Chancellor-isa shisem.
Addl. Director, YRS Rato Pusa lenisüba kübok Nagaland nungi teshimtet telok Guwahati-i ao.
Pa den külemi Assistant Director, YRS Jakedovo Chase, APRO, IPR Nongozo Rikha, Video journalist Bendangsunep Jamir, taoba International footballer & holder of ‘B’ license Roko Angami, Junior State Coach Ruopfu Meyase & Head, Youth Development, Football Club Aizawl aser Nagaland nungi ‘A’ license holder William Koso nungertem liasü.