Nagaland Kishore Kumar ken agi cancer akoker

Nagaland Kishore Kumar ken agi cancer akoker

Aikati CJ taküm indang meteta lir saka ano karibo meteta malitsüa akok, pai pa tenüng CJ ta amshir tetezü Chuba Jamir. Pa ya sempet aika aketba nisung ka lir aser pa nem agütsüba sempettem rongnung ken atentsü sempet agütsübajisa tajungtiba asütsü. Pai Hindi, English, Bengali aser Ao ken kanga junga atener.
Pa ya Longkhum nunger Wb.K.T.Yanger aser Alila na jabaso lir. Pa tanur asüdang 1970s nung par tsüraburtemi parnok ajak anir Mokokchung nungi Dimapuri alua adok. Par tsüraburtemji kentenmenü aser saisapong meimba tsüraburtem liasü. Nagaland nung shingaia Gymnastic indang tangashia mangashidang, par tsüraburi Dimapur nung 1978 küm Nagaland Youth Gymnastic Club tenzük. Iba denji parnok tsüraburtemi anir parnok dang martial arts, weight lifting, boxing aser tanga saisapong indang sayu aser itemji tanü tashi parnok senmang ama küma benshia arur.
Item ajak dak alaka CJ mulung atsübaji ken liasü. Pai ashiba agi, par tsüraburtem den Dimapur nung alitsü tenzükdang Dimapur nung par kidang kiyonger Bengali nunger aika liasü aser item kibong nung anepdang aser aonung kongki tapu balala amshia ken bushiba agi parnoka kentenmenü nung jangradaktsü. Iba anogo nungi tenzüka ken atentsübaji CJ asoshi taküm nung tejangratiba mapa aküm.
Ashiko, Dimapur nung tsümartem den külemi lia parnoki kongki atemba aser ken atenba agi pa mulunga akok alitsüa akok, ken ajak rongnung CJ-i jangrabaji Hindi ken atentsüsa tejangraba aser Hindi kentem rongnung pai Kishore Kumari atenba kentem kanga junga tentetter. Aji oda, pai atenba ken ola dang anga nungbo shitakba Kishore Kumar-i atener ta bilema angatsüsa tentetter. Iba jagi pa metettertemi pa dang Naga Kishore Kumar ta ajar.
Nagaland nung kentener tajung liaka, tangari memetet, mangu aser mangashi aliba mapang ka 1989 küm National level TV sentong ka nung takok ngua shilem agia liasü. Iba sentong nung pai Punjabi ken ken ‘Lehar Lehar Sangeet’ atenba agi pa kanga nüngtugu aküm. Iba ama sempet tajung liaka, Nagaland nung ken agi rongsen küma inyaktsüsa wadang sadema maliba agi, CJ dang masü saka Naga nunger kentener aika tebilemba metongtetter.Iba ama timtem liaka, CJ-i 2009 küm Kishore Kumar nem aküm agüja kensep ka yanglur Mumbai nung sayaa liasü. Pa kentenba angatsü asoshi yimten sentong tulu nung president, governor aser chief minister ama tongtibang nisungtemi pa jaoker aser aiben pai tv sentongtem nung shilem agir.
Pa tesem tai nung asoba agi tangar ama alimai meteta nüngtugu mekümtetter alitsüa akok, saka iba jagi pai tezümatanger, pai pa alidak pa sempet amshia akok tashi pelaa alitsü merangba nisung ka lir.
Atangji, nisung ajak asoshi anogo ajakbo tajung masü, anungji Naga Kishore Kumar asoshia pa kibong aser takümji aiben timtem aser tejashi ajangshiba taküm ka lir. Pa kinungtsü den melitetba dang masü saka ano 2012 küm pa tebang telonglen cancer tashidak putet. Ajisüaka, par kinungertemi AIIMs aser Apollo mozü kidang oagi anepludaktsüba sülen tangbo pa temang tajungba kümdagi. Iba amaji pa temang nung timtem liaka, pa tejangraba ulura nungji pai Dimapur nung GYM club nung oagi taret ajungshia exercise agir aser pai tangbo seret 300 ajunger atuteter. Pa yakta 75 kg category pur rongnung Veteran Powerlifting Championship toktepba nung shilem agitsü renemdagi.
Ano yakta pa Delhii orr pa tejakji plastic surgery agitsü saka aji masüdang pai ken mejema atentsü tenzükogo. Iba ama temulungtetba tulu aliba nisungji CJ lir.
“Tsüngrem taochi aser aser kütsü nungi angazükba tasütait shisatsü agi ni kü taküm nung timtem tulu koktetogo. Tsüngrem dak amangba tetezüji teimla mesamai ataba aser tajung bilemba asütsü,” ta Naga Kishore Kumarisa ashi.
CJ ya Naga Kishore Kumar dang masü saka Naga Jim Reeves aser Naga nunger kentenertem rongnung alakteta shimtetba nübo ka lir. Pa ama taküm aser sempet ajanga tangari Nagaland meteter. Iba ama sempetji meremsepdaktsüi tajungba amshia aotsü atema Nagaland sorkar aser asenokia reprangteta ajungshiteptsü nüngdaker.

You must be logged in to post a comment Login