Nagaland kübok district ajak nung lokti nübodoka merükmejur

Dimapur, Rongjui (September) 29 (TYO): September 29, 2018 nü Chief Minister Neiphiu Rio-i PHQ junction, Kohima nung state ajungalen Mass Social Work inyaktsü tenzüktsü.
Ease of Living Index-i bushiba osang aser Ministry of Housing and Urban Affairs (MoHUA), Government of India-i sangdongba nung, Nagaland yimtiba Kohima ya India nung talitsü majungba yimtsü 111 rongnung 110 buba nung aliba shia lir, ta tanü Chief Minister Rio-i o jembidang ashi.
Linük nung talitsü majungba jila ka nung alirtem ta asübaji maaksü ka lir, anungji Kohima nung alirtem saksalemtsüla aser Nagaland indang tanüdangtsü Kohima jenjang tajungba kümdaktsüdi, ta pai ayongzük.
Kohima tanaben merüka kümdaktsütsü atema ajaki yariteptsü amanger. Sorkaria küm ka tsüngda Kohima aser Dimapur nung gari lenmangtem tajungba yanglushitsü anungji colony lennirtem, NGOs aser ali kiburtemi sorkar den amaliteptsü mepishir, ta Rio-isa ashi.
Road & Bridges-i districts aser sub divisions asoshi temulung agütsütsü. Sorkari taruba hoptatem nung lenmang yanglutsü atema tender metetdaktsütsü aser iba mapang contractor tem jungjunga repranger ang mapa lemzüktsütsü, ta Chief Minister-isa shisem.
Naga nungertemi agitsüba dak alaka agütsütsü mebilemer aser timtemba atema sorkar dak dang tai tongloktsür. Ajisüaka, loktiliba ajungtsübaji nisung ajak tebilemtsü khuret lir aser shilem agitsüla, ta paisa metetdaktsü.
Sorkari streetlights reprangshimtsü, commercial buildings sentsü junga atepba aser merüka ayuba reprangtsü aser shitak meinyakertem dang senchi achitsü, ta Rio-i ashi.
Sentong nung Rural Development Advisor Dr. Neikiesalie Nicky Kire-i o jembidang, Kohima ya mini India ama lir aser kin, telok aser tamangba yimsü telemsa kecha melii külemi yimjung nung alir, ta ashi.
“Mokokchung jila nung sensotemi temeket merükmejua ayutsübaji külem tebilemtsü ta angateta mapa inyaker, anungji Kohima nung alirtemia iba yimya tajungji ajizüka pei temeket merüka ayutsüla,” ta Dr. Nicky-i ayongzük.
“Asenoki anogoshia asen temeket merüka yura aser jana endokdang endokra, national highways aser public tesem kar nung dak alaka lokti nübodokba mapa kangabo malitsü” ta paisa shisem.
Sentong nung mendenji Kohima Deputy Commissioner Rajesh Soundaranjan IAS liasü aser Faith harvest Church, Kohima pastor Hoping Kips-i temoatsü meshia sarasadem.
Dimapur: Honibarnep City Tower Dimapur nung Dimapur district nung lokti nübodaka merükmeju mapa inyaktsü tenzük.
Terenlok ta asüba ya kiiojen tululu yangluba dang masü saka temeket merükmejua ayuba dena lir, ta tanep Nagaland PHED Minister Jacob Zhimomi-i o jembidang ashi.
Prime Minister Narendra Modi lenisüba kübok Centre sorkari Swachh Bharat Mission alizüng den külemi GBs, Village councils, nübortem aser lennirtemi iba osang prokshitsüla, ta paisa ashi.
“Panchayat jenjang tashi nung asenoki iba osang prokshitsüla. Dimapur ya Nagaland nung shishilembadak tongti tesem lir, anungji Dimapur nungi tenzüker asen state ajungalen merüka ayutsüla” ta Jacob-isa shisem.
Nagaland Deputy Speaker, Zhaleo Rio-ia ashiba agi, merükmejuba ya asen taküm nung shilem ka südaktsütsüla aser sensotem, Civil Hohos, Government Departments ajaki lokti nübodoka mapa inyakba nung shilem agitsüla, ta paisa ashi.
Ano, Power Advisor, Tovihoto Ayemi-ia dengue, malaria aser diarrhea kanga bulua adokba atema tebilemtsü bena lemsatepdang, “item tashidak ya merükmeju maliba ajanga adoker anungji village/ ward/ colony ketdangpurtemi mapang shia merükmeju mapa inyaktsüla” ta ayongzük.
Sentong nung mendenji Dimapur Deputy Commissioner, Sushil Kumar Patel (IAS) liasü aser pai Swachh Pledge zünga metetdaktsü.
Mokokchung: Mokokchung nunga tanep 6:00 ako nung Imlong Place nung “One Step towards Cleanliness” omen nung ajemdaker Swachh Bharat maparen tenzük.
Mokokchung Deputy Commissioner Sachin Jaiswal aser District Ambassador (SBM) Bendangnukshi na lia Brand Ambassador Swachh Bharat Mission (SBM) Supongmeren-i sentong tenzüktsü.
“State sorkari Mokokchung dang ‘Land of Pioneers’ ta jaloktsüogo, anungji asenoki merükmejuba lima ta ano tenüng tasen ka angutsü atema inyakdi” ta Supongmeren-i ayongzük.
Sentong nung mendenji ADC W. Manpai Phom liasü aser MTBA Pastor Rev. Ponen Longchar-i temoatsü meshia sarasadem.