Nagaland lemdangtsü asü ?

Jammu & Kashmir state agi ana küma lemdangtsüba sülen Nagaland state-a ana küma lemdangtsü amai aikati arendaka bilemer. India telongjem kübok Jammu & Kashmir aser Nagaland na adenba ya mesüktepa lir, kechiyong state anaprongla ya India government den tezüluba nung tangatettep ken o renema yur külenang, India telongjem nung aden. Atangji, state anaprongla nung yimten tebilemtsü agi sünga lir, anungji teti atema yimten telatetba kati arutsü nüngdaker. Ano, Jammu & Kashmir o Nagaland state na tebilemtsü mesüktepa aliba kaji Jammu & Kashmir nunga Ladakh nung alirtemi Jammu & Kashmir kübok medenüi Union Territory jenjang ka nung yutsütsü kanga liasü, anungji parnok nembo agütsüogo. Iba denji mesüktepa, Nagaland nunga anüdoklen aliba kintemi parnok asoshi state balaka agüjang ta akanger. Atangji, Jammu & Kashmir dangbo Nagaland yimten tebilemtsü tuluba aser tebenjaba lir, kechiyong Naga nunger asoshi India kübok Nagaland state akümba ya yimten tebilemtsü tatem küma latetba ka masü saka aonpu nungi mimongi ai ama, yimten tebilemtsü tulubaang küma aoba agi, tang tashi Naga nunger timtem tia nung lir. Ibaji dang masü saka Naga yimten nüchiso bushir telok ka agi ana aser ana agi asem ta telemsa adokyonga aruba tangbo trok tenet ka kümogo. Iba jagi India government den Naga nunger ka küma longjemer Naga yimten tebilemtsü ken o tatembang küma mejembitetter. Külen kari nüchiso meshir aser külen kari state balaka meshir ta asüba tensa tiaji ajak atema kanga temangmangtsüka aser aji agi Naga nungersa akoksar. Ajisüaka, ajak Naga nungersa asüyonga ki ka nung kangshia longjemer alitsü agibo mesüra meputepi alitsü agibo, ki balala nung lia putepa ali tajungba asütsü. Tang tashi nung Naga nunger ajak dena aliba yimten aser lokti tentet kata mali kümogo aser joko, Naga nunger yabo yimten aser lokti tentetren nung ka kümabo melongjemtettsü südi. Iba ama tia ka nung, parnoki meshiba ama Nagaland anüdoklen alirtem nem state balaka agütsüra, Naga nunger ajaki pelashishia agizüktsüla. Tang aliba Nagaland ya yamaisa ali tashibo Nagaland anüdoklen alirtem dang masü saka ajak akoksatsü. Delhi nungi sen kwi yokdir yokaka, Nagaland-bo merenloktetter, State kümer küm 55 nunga medical aser enginering college kata melapoktetba state-ji Nagaland lir. State kümer küm 55 nunga lenmanga meyanglutet, industry kata maka, government school nung tazünger mali ser ita sen nung sen crore aika endokbaji Nagaland lir. Iba ama state nung shibaibo külemi linütsü ? Iba ama state kübok ali tashi shinga maintsü. Iba state nung tetoktepba ka dang lir, ibaji nübortem meyong sen auyaa kiojen tuluba, talangba aser teimba yanglutsü tokteper. Atangji, Naga yimten tebilemtsü melatettet küm aika aruba yagi Naga nunger dang masü saka India dena akoksar, anungji India government-ia yaktasa Naga yimten tebilemtsü ya latetner. Iba tangatetba aser tebilembaji center government nung yimsüsürtemia shiogo. Tang Naga nunger nüchiso bushir telok den India government ken o tatem küma renemtsü asoshi anünga akaba ken oji, Naga nunger asoshi temzüng aser nisan balaka amshitsü asoshi Naga nungertemi akangba onük dak aketba nung hai haura mekateti lir ta angazüker. Tang India government-i Jammu & Kashmir nung inyakba ama inyak nungbo, Naga nunger tebilemtsü latettsübajia India asoshibo tasak masütsü. Ashiko, India government-i Nagaland yagi ana kümtsütsüa akok aser tang Nagaland kübok maliba Naga nungertem nema yimten jenjang balaka agütsütsüa akok. Iba ama telemtetba ka agütsüra, Naga nungertem rongnung mepelatep melii agizüktsüsa Naga nunger mulungjang renema atatsüla. Ochi o kaji, kechikomaka telemtetba ka agidir agiaka aser kong lidir liaka, Naga nungerbo Naga nungersa asütsü, anungji Naga ta asüba tenüng jagi Naga nunger longjemdaktsütsüla aser Naga yimten nüchiso atema taküm tenla agütsürtem tenla mamadoki kati ka ajungshitepa yaritepa alitsüang bilemtsüla.