Nagaland LFA-i lanur aser rejutem dak tenük yoka HIV & AIDS anema raratsü

Kohima, February 8 (TYO) : HIV aser AIDS anema raraba nung lanurtem aser rejutem dak tenük yoka temetettsütem sangdongtsü ta Nagaland Legislators Forum on AIDS, (LFA)-i Hombarnü bangzünga renem.
February 8, 2016 nü Assembly Secretariat nung LFA Annual General Meeting nung iba telemtetba agi. Sendenji Speaker Chotisuh Sazo lenisüba kübok agi aser Chief Minister TR Zeliang-i Chief Patron ama shilem agi.
HIV/AIDS dak sendakba onüktem aser tayongzükba balala atema NLFA züngsemtemi telemtetba kar agi aser mezüngbuba nung iba khuret nung tatartem ajaki teyari agüja nungittsü lemtet.
Tanabuba nung, Bank ka nung sen crore 5-10 shi Fixed Deposit ama ayutsü aser iba nung tetemlok anguba jagi NLFA den sendaktepa aliba arogotemi inyakba mapa nung amshitsü lemtet.
Arogotemia mission mapa ama Non-Christian pur den HIV/AIDS noktangtsü atema sentongtem agitsü aser arogo ajak nung HIV/AIDS atema core-group ayutsü aser iba telok ajanga maparen tiptema inyaka aotsü, ta tanü NLFA-isa telemtetba agi.
Telemtetbatem rongnung, loktiliba nung tilatiba jenjang nungi awareness mapa inyaktsü aser HIV tendangtsü ajungmesoa HIV aketba nisungtem dang tetsübu mesüra tarendakba kecha melii tejakleni arutsü ayongzüktsüba dena lir.
Ano, Chief Secretary ketdangsüba kübok sorkar department temi LFA fund nem pei department-i akoba teyari agütsütsü atema lemtet.
NLFA nung Nagaland Chief Minister, Nagaland Legislative Assembly Speaker, MLA tem, Chief Secretary-i anir ketdangsertem, Arogotem tongti telok, Project Director NSACS aser NSACS staff tem dena lir.