Nagaland linük atema India den olemteptsü kecha mali

Kohima, August 14 (TYO): Nagaland ya linük balaka lir anungji Naga nungertemi Nagaland linük atema India den olemteptsü kecha mali ta Naga National Council (NNC)/ Federal Government of Nagaland (FGN)-i tanü metetdaktsü.
“India nüjiso mangudang Nagaland-i nüjiso anguba osang sangoktsü. Asenok asen linük temeten meteta lir, asenoki India dang nungi kecha makhanger aser Nagaland linük atema olemteptsü kecha mali” ta FGN Kedahge Gen. (Retd.) Viyalie Metha-i ashi.
Chedema Peace Camp nung 73 buba Nagaland Independence Day benjung amungdang pai iba osang metetdaktsü.
Nagaland ya tanga linük ka nungi agiteta akümba linük ka masü mesüra nisung kari apiteta kümtetba masü. Tetenzük nungi Naga nungeri Tsüngremi agütsüba linük tangar dang nungi kümzüka aru, ta paisa ashi.
Ajisüaka, küm neter tema tsükchirtemi armed forces tashi amshia Naga nunger litsü teimba ka atsünga agia lir aser Naga nunger east-west-north-south lemsatsüogo. Ajisüaka Naga nunger ka dang lir aser ka dang asütsü, ta Gen. (Retd.) Mehta-isa ashi.
Tanü benjungmung nung NNC president Adino Phizo, Naga army officers aser FGN ketdangpurtem aika aden.
Chakhesang, Shepoumaramth, Chang, Zeliangrong, Khimaniungan regions aser Kuki Tribal Union teloktemi sobaliba shilem balala agi.
Sentong nung Killo kilonser Shevohü Keyho-i okila jembi aser Rev Tsolie Chase-i temoatsü meshia sarasadem. NNC spokesperson Kolezo Chase-i anküp tepela o jembi aser Rev Kiezotuo Zhale-i tenüngsang agüja sarasadem.