Nagaland Lok Sabha MP-i Angh den ajurutep

Dimapur, August 21 (TYO) : Nagaland nungi Lok Sabha Member of Parliament, Neiphiu Rio-i August 19, 2016 nü Raj Bhavan, Kohima nung Nagaland Angh, P.B.Acharya den ajurutep, ta PRO to Governor-i sangdong ka nung metetdaktsü.
Iba mapang Lok Sabha MP-i Angh den Dimapur kübok Selouphe yimtsüng nung terenlok mapa inyakbatem indang osang metetdaktsü. November 2014 nung MP Neiphiu Rio-i Sansad Adarsh Gram Yojana (SAJY) kübok iba yimtsüng adopt asü.
Rio-isa Sansad Adarsh Gram Yojana (SAJY) kübok yimtsüng tanabuba adopt süogo aser ibaji Mon District kübok Longwa yimtsüng lir. Angh-i iba yimtsüng adopt asütsü tebilemba lemsatepba sülen Rio-i adopt asü, ta PRO to Governor-isa metetdaktsü.
SAJY kübok Angh House yanglushiogo aser iba ki ya tesadang ka India litsü nung aser tesadang ka Myanmar nung lir. October, 2016 nung iba ki semzüktsütsü atema Rio-i Angh P.B Acharya jaok, ta sangdong nungsa shia lir.
Yimten telok ajak nungi Member of Parliament tem telatetba ka kübok aitdaktsütsü nükjidong nung Sansad Adarsh Gram Yojana (SAGY) ya tenzük. Iba scheme kübok MP shia yimtsüng ka shima ibaji ‘model village’ ka kümdaktsütsü atema terenlok mapa inyaker. SAGY kübok MP kati pa/lar yimtsüng mesüra kinungtsü/kinungbo’er yimtsüng dak alia tanga yimtsüng ka adopt asür.
MP temisa 2019 general elections matongdang ano yimtsüng talila adopt asütsü akok aser item yimtsüng nung smart schools, basic health facilities aser ki tajungtem yanglutsür.
Angh P.B Acharya-i MLA ajak dang peipei constituency nung yimtsüng ka mesüra ana adopt süa anepalutsü atema mepishia metetdaktsür, ta PRO to Governor-isa sangdong nung shia lir.
India ya yimtsüngtem aliba linük ka lir ta asen India Tir-i sangoktsüogo, anungji linük ajunga renloktsü atema yimtsüng renlokdaktsütsübaji kanga tongtipang lir. MLA tem ajaki yimtsüngtem renlokdaktsütsü aser yimdaklirtem tashi itdaktsütsü atema mapa inyaktsüla, ta Nagaland Angh-isa ayongzük.