Nagaland Lokayukta nem sadoka inyakdakjang: NVCO

Dimapur, February 5 (Agencies): Nagaland nung Lokayukta-i mapa takok ngua inyaka otettsü atema facility tagütsütsü tim ajak agüjang ta Nagaland Voluntary Consumers’ Organisation (NVCO)-i state sorkar dangi shidi ka zülu.
February 1 nü Nagaland governor PB Acharya-i taoba Meghalaya High Court nung chief justice Justice Uma Nath Singh Nagaland nung Lokayukta inyaktsü atema shim.
Nagaland nung Lokayukta amenokba atema kanga pelar aser iba küm tasen ya Nagaland nung lokti temeten anguba küm ka asütsü imlar, ta NVCO-isa metetdaktsü.
Lokayukta-i tetsübu kecha melii Naga loktiliba nung temeten bener arutsü atema Nagaland nung alirtemi imlar, kechiyong Lokayukta kübok chief minister indang office dena office ajaki aiter, ta NVCO-isa ashi.
Sorkar mapa ketdangsertemi ochimashi, ketdangsübaren nung tashi maitba, tejak repranga inyakba atema ken o benokdang Lokayukta-i bushisüngtsü aser tai tongloktsübaji shitak-a putetra, temerenshi alitsü, ta parnokisa shisem.
Asen Naga loktiliba nung temeten bener arutsü atema MLA tem, ketdangsertem aser temaba jenjang nung alirtemi ochishia mapa inyaktsüla. Achiajem manguba tia agienba ama ochimashi agientsüla aser iba ajanga lokti nung temeten bener arutsü, ta NVCO-isa ashi.
“Lokayukta-i sensotem indang temetentem kümzüka ayur aser Lokayukta ya sorkar tenüng nungi teshimtet nübo ka lir aser sensotem indang medemer ka lir” ta parnokisa shisem.