Nagaland LS by-election nung vote 75% shi liasü; EVM raksatsüba atema nisung 7 apu; NPF & BJP-i re-poll asütsü akhanger

(Abelen) Khensa yimtsüng nung arishi küm 90 tain tantsür ka vote agütsüi anir arudang agiba noksa angur. (Achiji) L. Khel Kohima Village nunga taintem vote agütsütsü atema polling station kima noktaka lia tangokba noksa angur.

Kohima, Monupii (May) 28 (TYO): Tanü Nagaland nung Lok Sabha by-election nung vote agütsür nisung 11,97,436 nungi 75%-i vote agütsür alitsü ama asadangteter. Ano, polling station ka nungbo EVM raksatsüba atema nisung tenet apu ta by-election atema Returning Officer-i osang metetdaktsü.
Polling station ka nung EVM raksatsüba aser political party temi polling station 17 nung re-poll alitsü takhangba agütsüba dak alaka tanüngba tesemtem nungbo polling tiptema agiogo, ta Returning Officer, M Patton-i ashi.
Tang tashi nung polling station aika nungi aser talisa meta talang pilar aliba tesemtem nungi osang tejangja mebententeti lir, anungji iba jagi 75% shi kati shilem agir alitsü akok ta asadangtetba osang metetdaktsür. Polling ketdangsertemi pei pei district headquarters nung Assistant Returning Officer indang office tonga aruba sülen ang iba osangji jangjatsü, ta paisa metetdaktsü.
2014 küm Lok Sabha election nung vote agütsür 88.25% ajanga shilem agia liasü.
Taküm by-election nung People’s Democratic Alliance (PDA) nungi Tokheho Yepthomi aser Opposition Naga People’s Front (NPF) nungi C Apok Jamir na toktep.
Mokokchung district kübok Aonglenden Assembly Constituency nung Kubza Polling Station No. 13 nung nisung telok kati booth telungi nungpoka ai aser EVM machine raksatsü. Iba jagi Deputy Commissioner-i re-poll asütsü tetuyuba agütsüogo aser EVM raksatsüba dak sendakba nung police-i nisung tenet pua lir, ta M Patton-isa ashi.
Tanü nikongtsütsü 1:10 ako meta nisung 70-80 shi ka polling station-i aru aser ballot unit o control unit na raksatsü. Ajisüaka, VVPAT bo shitak dang lir, ta paisa shisem.
“Iba polling booth nung vote 85% shi agütsür liasü aser iba tatalokba sülen vote ka danga magütsüdaktsü” ta DC & ARO Mokokchung, Sachine Jaiswal-i osang metetdaktsü.
Ano, Phek district kübok Meluri sub-division nung polling party temi polling station 17 nung re-poll asütsü aser Kohima nunga polling station ka nung re-poll asütsü atema takhangba agütsüogo, ta RO M. Patton-isa ashi.
NDPP pusemertemi yimtsüng 10 nung NPF pusemertem nem vote magütsüdaktsü ta ken o ka benok. Yimtsüngtemji Meluri Christian Khel A, Meluri Christian Khel B, Meluri Non-Christian Khel, Rieteupe, Meluri Town A Wing, Meluri Town B Wing, Meluri Town C Wing, Meluri Town D Wing, Khumiasu aser Lephori lir.
Ano, BJP-ia yimtsüng 6 nung NPF pusemertemi NDPP pusemertem nem vote magütsüdaktsü ta ken o ka benok. Parnoki ashiba yimtsüngtemji Mollen, Hutsu, Yesi, Kuzatu, Shatuza aser Setisotha lir.
Kohima nunga NPF-i Lerie colony nung aliba PS No 38 nung re-poll asütsü takhangba agütsüogo. Parnok pusemer ket nung voter’s slip maliba agi Election Commission-i ashiba kulikakettem bener ao saka vote magütsüdaktsü ta NPF-i ken o benokba nung shia lir.
Tanü by-election agiba indang osangji asüngnep 11:00 ako nung polling ketdangsertemi meyipa reprangtsü aser iba sülen ang ECI-i re-poll asoshi telemtetba agitsü, ta M Patton-i ashi.
Re-poll agitsüsa kümra, May 30 nü agitsü aser May 31 nü Nagaland kübok centre 13 nung votes azüngtsü, ta paisa shisem.
Tanü Chief Minister Neiphiu Rio den pa kinungtsü aser tanurtemi par yimtsüng Touphema Basa nung vote agütsü, ta NDPP osang ka ajanga metetdaktsü.
Opposition lennir T R Zeliang-ia pa kinungtsü den külemi Peren district kübok Jalukie jila nung vote agütsü.
Tanep 7:00 ako nungi polling station 1887 nung vote agütsütsü tenzük aser ibaji nikongtsütsü 4:00 ako nung tembang. Ano, polling station 309 nungbo tanü nikongtsütsü 3:00 nung tembanga liasü. Senzüsenbongtsü asoshi tetsükdaktsü aliba polling station 309 nung polling ketdangsertem district headquarters-i meyipa aotsü atema nikongtsütsütsü 3:00 ako nung vote agütsüba tembang, ta Returning Officer-isa metetdaktsü.
Central Armed Police Forces company 40 den Nagaland Armed Police company 80, Home Guards 770 aser village guards 2600 tashi by-election nung mapa lemzüktsü, ta CEO Abhijit Sinha-ia ashi.