Nagaland maneni shibangtsü: Temjen Toy

Kohima, May 17 (TYO): Nagaland nung novel Corona virus agi shiranger ka danga puteta mali saka iba wara nungi jenbua alitsü atema state sorkari lockdown pezübuba alitsü telemtetba agiogo.
“May 4, 2020 nü Nagaland lockdown dak sendakba nung tetuyubatem agüja aliba magiener aser tanga tetuyuba tasen magütsü tashi benshitsü” ta Chief Secretary Temjen Toy-i Deobarnü metetdaktsüogo.
“COVID-19 anema raraba nung Nagaland ya Green Zone nung lemzüka lir, saka COVID-19 ya tangtangbo mesamatsü aser asenok teti atema lockdown kübok malitsü. Anungji, iba tetsüngda nung alitsü atema asenoki bushitsüla. Iba atema sorkari lenmang bushidar, ta paisa ashi.
Tang agi pezübenbuba atema linük ajunga shibangdang Prime Minister Narendra Modi-i state tem nem tashi talila agütsütsü ta shiogo aser iba amaji asenokia Standard Operating Procedures (SOP) yanglutsü ta Temjen Toy-isa ashi.
Nagaland nung shisaliok rejutem tangbo melapoktsü aser inter-state arrtsütem maneni shibangtsü, ta paisa ashi.
Linük kübok tangalen anendaka alir mezüng telok Mongulbarnü Nagaland tonga arutsü. Ajisüaka nisung 1382 tashi pei pei sasa anepalua state tonga aruogo.
Nagaland-i meyipa arurtem ajak agizüktsü atema renema lir. Ajisüaka hospitality sector nung inyakba Naga nunger atema bilemtsür kechiyong hospitality sector ya tangbo melapoktsü amai bilemer. Iba denji private sectors nung inyakertemi meyipa arunür saka parnoki Nagaland tonger kechi inyaktsü ta terata ka nung lir, ta Temjen Toy-isa metetdaktsü.
Tangalen nungi arurtem ajak asen lokti nung dendaktsütsüla aser parnok yaritsüla. State sorkaria iba atema olemtepdar aser parnok yaritsü atema sentongtem renemdar, ta paisa ashi.