Nagaland, Manipur, Meghalaya & Mizoram nung Hindu Bengali nunger maliba agi CAA kübok metendaktsü

Guwahati, January 24 (Agencies): Nagaland, Manipur, Meghalaya aser Mizoram ama state tem nung Hindu Bengali nunger maliba agi Citizenship Amendment Act (CAA) mebenoker, saka Assam, Tripura aser Sikkim nung Hindu Bengali nunger aliba agi CAA benoker, ta Assam Minister Himanta Biswa Sarma-i ashi.
Guwahati nung Bharatiya Janata Yuva Morcha (BJYM)-i Youth Parliament ka ayongzüka agidang Sarma-i “CAA kübok Assam adener saka tanga North eastern state tembo madener ta jembibaji tim masü” ta ashi.
India sorkar indang records nung ashiba agi Nagaland, Manipur, Meghalaya, Mizoram nung Hindu Bengali nunger balaka mali. Item state tem nung mebenokbaji kecha masü, saka iba ajanga lungkak tali aittsü aser tensa mejungi akümtsü akok, ta paisa shisem.
Item state tem nung Citizenship indang application ka danga maru. Mizoram, Arunachal Pradesh nung Inner Line permit lir aser Meghalaya nunga Shillong alia sixth schedule benoka lir. Tripura, Assam aser Sikkim nung Hindu Bengali nungertem lir, ta Sarma-i metetdaktsü.
Ajisüaka, BJP-i Nagaland, Meghalaya, Manipur Mizoram aser Arunachal Pradesh metetshir, kechiyong iba ajanga tangatetba tai ka agütsütsü akok aser tensa mejungi akümtsü. Assam nung Hindu Bengali nunger arutsü ta osang tai belenshiba amaji item state nunga belenshitsü akok, ta paisa ashi.
Assam nung tea estates nung osang tai belenshir aser iba ajanga nisungtemi aonung anüker. Anungji, CAA nung item state tem metetshibaji tim inyakyim ka liasü, ta Sarma-isa shisem.