Nagaland Medical College kimung meshiteta sarasademogo

Dimapur, Mongputeni (October) 5 (TYO): Kohima yimtsüng lushi nung Nagaland Medical College yanglutsü mapa kümtetdaktsüba atema Health & Family Welfare Minister S. Pangnyu Phom-i Kohima yimertem dang pelaba metetdaktsü.
State sorkar aser Department of Health & Family Welfare den amalitepa, angateta aser taochi sayuba atema kanga pelar ta Minister S. Pangnyu-isa ashi.
October 5, 2018 nü Nagaland Medical College Kohima yanglutsü atema meshiteta sarasademba sentong nung pai iba osang metetdaktsü.
Sorkar, department aser nübortem külemi longjemer 2020 tashi nung Nagaland nung mezüngbuba Medical College lapoktsü merangdi ta Pangnyu-isa ayongzük.
Paisa Kohima yimertem dang tanüker tajung ka asütsü aser iba alizüng tongtettsü atema yariteptsü mepishi.
Sentong nung Rural Development Advisor Dr. Nicky Kire-ia Medical Minister dang iba College atema temulung agütsütsü mepishi.
IPR, SCERT aser Village Guards Advisor Toshi Wungtung-ia o jembidang, iba ya Nagaland nung alirtemi mapang talangka aginüa aruba lir aser linük nung Medical College tajungtiba ka Nagaland nung alitsü imlar, ta ashi.
Kohima Village Council nung Vice Chairman, Khriezothie Chielie-i sorkar aser department dang pelaba ashi aser tekaratiba nung iba college lapoktsüsa mapa inyaktsü ayongzük.
“Iba college ajanga shiranger aika tajangzük angutsü. Onoki akokba tashi yariteptsü aser College indang tanüker ka ama tetsükdaktsü kecha majurutsüsa yariteptsü” ta Khriezothie-isa shisem.
Tanü agiba sentong nung Soil & Conservation, Women & Child Development Minister Kashiho Sangtam, Rural Development Advisor Dr. Nicky Kire, Fire & Emergency Services, SIRD & Relief & Rehabilitation Advisor Phowang Kongyak, Law & Justice, Border Affairs and Treasuries & Accounts Advisor Dr. Longriniken, Irrigation & Flood Control Advisor Namri Nchang, IPR, SCERT & Village Guards Advisor Toshi Wungtung, DUDA Advisor Bongkhao, Regional Director MH&FW, Guwahati Dr. P Gogoi aser Charlie Sekhose nungertem aden.
Nagaland Medical College ya Phriebagei Kohima Village nung ali acre 50.20 nung yanglutsü. Tanü Khedi Baptist Church Kohima Pastor Rev. Viwelie Khezhie-i kimung meshiteta sarasadem.

You must be logged in to post a comment Login