Nagaland Motorcycle Club-i Dmr Traffic Police  nem road signs agütsü

Dimapur, August 16 (TYO): Dimapur nung traffic tebilemtsü nung Dimapur Traffic Police den yariteptsü asoshi Mongolbarnü Nagaland Motorcycle Club-i City Tower nungi ‘Independence Day rally’ ka tenzüka railway station anasa aliba Traffic Control Station nung tembang aser parnoki officer in charge of traffic zone- I, LM Patton nem gari lenmang nung temaitsütem (street signs) agütsü.

Iba sentong nung jembidang Patton-i parnoki mera agia inyakba atema pelaba lemsaba den külemi Nagaland Motorcycle Club-i tatishitsü tajung sayua inyakogo, ta ashi.

Paisa, apu chirepba aser tzümetsüng ajanga Dimapur nung traffic kanga timtemba mapang, iba den külemi benjung mongpu atongba mapang ka nung NMC-i nüburtem dang gari timi amshitsü tayongzükba agüja 71buba Independence Day anogomong nung gari lenmang nung temaitsütem agütsübaji junga apiteta inyakogo, ta ashi.

 Kasa sentong nung traffic ketdangser karia jembia liasü, aser parnok rongnung kati, nüburtemi duty nung aliba traffic police temi aibelenbabo kera puteta social media nung noksa prokshir, ajisüaka parnoki traffic ozüngtem sülenbo manidaker aser gari lendong nung yirua alir ka yaritsü melen noksa tangoker social media nung ang kerakera prokshir, ta ashi.

Laisa, nüburtemi traffic police tetsürtem bendanga amshiba aser nisungtemi two wheeler anentsü lemzüktsüba tesem nung gari anena yua traffic temzüngtem alema inyakba ajanga aika timtemdaktsür, ta ashi.

Ano NMC züngsemtemia traffic police den tebilemba lemsatepa liasü. Tesülen NMC züngsemtem aser traffic police temi yimti tesem balala nung gari lenmang temaitsütemji yutsüyonga ao.