Nagaland Municipal Act, 2001 atema senden amen; Chief Minister-i Act nung temelenshi kar benok

Kohima, November 16 (TYO): Nagaland Department of Municipal Affairs-i tanü Capital Convention Centre Kohima nung tribal Hoho tem den Nagaland Municipal Act, 2001 dak sendakba senden ka ayongzüka amen.
“State sorkari Nagaland Municipal Act nung temelenshi kar asütsü tebilembatem onoki Naga tribal tentettem dang shinür aser parnok den asüngdangyanür. Angami Public Organisation aser Ao Senden ajanga tebilembatem benokba nung ajemdaker sorkari act nung temelenshi kar sünür” ta senden nung Chief Minister, T.R. Zeliang-i ashi.
Nagaland Municipal Act nung Arla 23-A aser 23-B nung, municipalities atema scheduled castes nem menden lemzüktsüba mamshitsü mesüra agientsü atema state sorkari tebilemba benoker. Iba shisatsü ya APO-i agütsüba lir, aser Linük Temzüng Arla 243-T nungbo iba ya agienogo, ta T.R Zeliang-i ashi.
Ao Senden-ia state sorkar den tongtibang onük ana atema tebilembatem lemsatepogo aser itemji tetsür nem shilem 33 lemzüktsüba aser ali o kiojen nung saru agiba lir, ta paisa ashi.
Naga nunger loktiliba nung tebur aser tetsür tsüngda tebendang mali, anungji tetsür nem shilem lemzüktsütsü madoker. Anungji, asen lokti, sobaliba aser inyakyim tiptema ayutsü atema tetsür nem shilem lemzüktsüba agientsüla, ta Ao Senden-i sorkar dang tebilemba lemsatepogo. Iba asoshi municipalities nung tetsür tem voting right den nominate asütsü junger ta sorkari bilemer, ta chief minister-isa metetdaktsü.
“Iba onük atema sorkari Naga Mothers’ Association kübok Joint Action Committee on Women Reservation den aiben senden mena, parnok nem haihaura südaktsütsü merangogo aser tatem nung NMA iba atema Supreme Court nungi oshidang ka angutsü atatsü atema telemtetba agi. Anungji, tetsür nem shilem lemzüktsüba onük atema State Cabinet-i 2006 küm Nagaland Municipal Act, 2001 yanglushiba nung aliba ama shilem 33 lemzüktsütsü atema telemtetba agi” ta paisa ashi.
September 21, 2012 nü Women Reservation atema Assembly Resolution ka agi aser tan November 22 nungi tenzüktsü aliba Assembly session nung iba ya benoktsü aser state cabinet-i tang tesüsa agiba aliba telemtetba den liromedema Assembly resolution tanga ka yanglutsü. Ibaji asü nungdang Assembly Resolution aser sorkar mapa nung tetsükdaktsü malitsü, ta TR Zeliang-i ashi.
Ali aser kiojentem atema saru agitsüba dak sendakba nung Ao Senden-i Nagaland Municipal Act nung tai aika apu. Iba onük ya sorkari süoki ia agizükogo aser sorkari iba asoshi temelenshi kar benokdanger. Ao Senden-i kanga dang tongti süa magizükbaji, ali aser kiojentem atema tax arrears meyipa agitsü atema ali aser kiojentem sotba aser sen teimba agütsür nem open auction ajanga yokdokba lir.
Parnoki ashiba agi, iba inyakyim ya Linük Temzüng Arla 371-A nung lateta aliba inyakyimtem anema lir, kechiyong iba inyakyim ajanga bendanger (Non local) nem ali agütsütsüsa akümtsü.
Iba nungji ajemdaker state sorkari Nagaland Municipal Act nung ali aser kiojen dak sendakba telatetbatem meyipa reprangshitsü aser melenshitsü tebilemba lir, ta CM-isa ashi.
Senden nung Municipal Affairs & Economics & Statistics Parliamentary Secy., R. Tohanba-ia o jembidang, sorkar indang jenjang aser municipal o town council election agitsü indang olen ka ashi.
Naga Hoho president, Chuba Ozukum-ia federal assembly nung lemtetba indang nenshia metetdaktsü aser maneni Arla 371(A) nung lateta aliba ama Naga nunger li aser temeten kümzüka ayutsü ta paisa ashi.
Naga Hoho-i tetsür anema menoktaker saka tetsürtemji tebur den kasa ta züngshir. Ajisüaka, municipal act nung inyakyim kar Naga nunger sobaliba den meputep aser iba ya jungjunga meyipa merprangshi tashi magizüktsü, ta Chuba Ozukum-isa shisem.
Election magii tetsür nem shilem lemzüktsüba tebilemba pai mulunga agizüker aser winter session nung sorkar Nagaland Municipal Act yanglushitsüla, ta paisa metetdaktsü.
Naga Hoho-i Arla 371(A) nung ajemdaker noktakba nung parnoki pusema nungiter, ta Toshiwungtong-i ENPO tenüng nung jembidang ashi.
Nagaland ya yimten mapa ajanga tentetba tribal state ka lir. India ketdangsertemi tenangzüktep ka ajanga Naga nunger maitsü magizükdang nungi Nagaland state ya British nunger yimsüsüba mapang tashi nung tera yanga lir. Arla 371 (A) ajanga Naga nungerji India sensotem ta züngoker anungji tanü India-i iba Arla agientsü merangra, parnoki Naga nunger salatsüla, ta Toshiwungtong-isa shisem.
Tanü senden nung adener tribal hoho president ajak nem Municipal Affairs Department-i tasüngdangba kar agütsüba nung ajemdaker o jembitsü mapang agütsü. Iba mapang Ao Senden, APO, Lotha hoho, Rengma Hoho, CPO, Pochury aser Konyak Union tirtemi o jembi aser parnok ajaki o jembidang, Municipal Act ajanga ali aser kiojen nung saru agitsü lateta aliba magizüker ta metetdaktsü.