Nagaland Municipal election nung tetsür shilem 33% alitsü

Kohima, August 11 (TYO): Mapang talangka atsütepa arur külen, yashi Bodbar nü Nagaland government-i Nagaland Municipal Act, 2001 nung ajemdaker Urban Local bodies (ULB) nung shilem agitsü atema tetsürtem nem noklang nung shilem 33 agütsütsü telemtetba agiogo.
Iba telemtetba ya yashi Bodbar nü Nagaland Cabinet senden nung lemtet aser iba osang ya tanü Brehostibar nü lokti senden ka nung jembidang Chief Minister, T R Zeliang-i metetdaktsü.
Nagaland nung Municipal aser Town council maliba ajanga Centre nungi ULBs atema lemzüktsüba senotsü magitetter, ibaji state asoshi takoksa tulu lir ta tetsürtem nem 33% shiteta yutsüba den külemi ULBs election agitsü nüngdakba kuli ka Chief minister-isa metetdaktsü.
Nagaland nung municipal aser town council December 2009 nungi March 2010 tashi nung temadokba sülen tang tashi election magi arur.
T.R.Zeliang-isa ashiba agi, Naga Mothers’ Asssociation (NMA)-i anir Joint Action Committee-i Naga tsürtem nem ULBs nung menden 33% agütsütsü tim ta Supreme Court nung ken o benokba ajanga tang tashi election magiteti arur.
Nagatsürtem nem ULBs nung menden 33% lemzüktsütsübaji Naga kin shia nung teburtem telongjemibo magizüktetter saka iba dak aketba onük tatsü talang ajak lemteper külen tetsürtem nem 33% ji agütsütsü lemtet, ta T.R.Zeliang-isa metetdaktsü.
Joko, telemtetba agiadoker asünungji municipal aser town council election agitsüba anogo dang yakta latettsü ta paisa metetdaktsü.
Ano, State Cabinet-isa Nagaland nung Municipal Commissionerate balaka alitsü nüngdak madoker, anungji Advocate General ajanga Gauhati High Court nung benoka jembitsü lemtetogo.
Ano, Cabinet-isa Municipal Affairs department ajanga state nung Town Councils tasen tuku akümtsü asoshi benokba onük agizükogo. Itemji Wokha district nung Bhandari, Phek district nung Chozuba, Dimapur district nung East Dimapur, Tuensang district nung Longkhim, Mokokchunhg district nung Mangkolemba, Kiphire district nung Pungro, Peren district nung Tening, Mon district nung Tizit aser Tobu alitsü.
Cabinet-isa Urban Station Committee tesem pongo nung akümtsü latetogo. Itemji Peren district nung Athibung, Tuensang district nung Chessore, Mokokchung district nung Chuchuyimlang, Tsudikong aser Yisemyong alitsü.
Ano, cabinet-isa state nung Sub-District Industry Centre trok lapoktsü telemtetba agiogo. Itemji Zunheboto district nung Atoizu, Mokokchung district nung Mangkolemba aser Tuli, Phek district nung Meluri, Tuensang district nung Noklak aser Mon district nung Tizit alitsü. Item tesemtem nungji tang Industries & Commerce department nung teinyakdakpurtem dang yoka inyakdaktsütsü telemtetba agiogo.