Nagaland-Myanmar tsüngda hospital amenoktsü benokogo: Acharya

Dimapur, April 12 (TYO): April 12, 2017 nü Raj Bhavan, Itanagar nung Myanmar nung Indian Ambassador, Vikram Misri-i Nagaland aser Arunachal Pradesh Angh, P.B. Acharya ajurua liasü aser iba senden nung Northeast, India ajanga India aser Myanmar tesendaktep tajungba akümtsü atema o lemtepa liasü, ta Arunachal Pradesh Raj Bhavan sangdong ka ajanga metetdaktsü.
Ato kilonser, Narendra Modi-i ‘Act East’ mapatong ajanga North East Region nung terenlok mapatem inyaktsü mangdang aliba metetdakja Angh-i, “India aser Myanmar naji nükjidong yur tembar kümtet, kechiyong linük ana sobaliba aser tamangba yimsü mesüktepa lir,” ta ashi.
“Nükjidong tejangja yura asenok tesendaktep tajungba kümtettsü,” ta Anghisa ashi.
Anghisa, tesem nung nüburtemi pei nija onüktem toktsür loktiliba tashi aittsü atema inyaktsüla, iba den külemi gari lenmang tesendaktep aser nüburtem tsüngda amalitep alitsüla, ta ashi.
1968 küm nungi pai tesem nung ajemshibatem nung ajemdaker Angh-i, tesem nung aliba nüburtemi NE indang atangji onüktemji Delhi nung benoktsüla, ta ashi.
Acharya-isa, Nagaland aser Myanmar arrtsü anasa medical college cum hospital ka amenoktsü atema pai benoka jembir, ta metetdaktsü.
Ambassador, Misri-i Myanmar den International arrtsüa aliba state pezü- Arunachal Pradesh, Nagaland, Manipur aser Mizoram semdanga arua lir aser pai Angh den tongtibang onüktem nung o lemtepa liasü.
Iba senden nung Angh kinüngtsü, Kavita Acharya, Ambassador kinüngtsü, Dolly Misri, Angh atema Secretary, Vinod P. Kavle aser pa kinüngtsü, Namrata V Kavle nungera dena liasü.