Nagaland NCC Cadet-i Sri Lanka semdang

Senior Under Officer (SUO), Mejungsungkum Longkumer, No1 Nagaland Air Squadron NCC-i bendanglen linüktem nungi NCC cadet-tem den Sri Lanka nung agiba arok noksa ka yangi angur.

Dimapur, October 31 (TYO): Sri Lanka sorkari jaokba sülen India ajunga nungi züngsem 12 densemba National Cadet Corps (NCC) teloki Sri Lanka linük tan October ita 12-26 nü tashi semdangogo.
Delegation head, Colonel Chetan Gurbax; delegation leader, Colonel Renukanath Rao aser Asst. delegation leader, Captain Chavi Sood nungeri aniba NCC teloki Sri Lanka nung ayonga agiba Youth Exchange Programme (YEP) nung shilem agia liasü.
Tan Sri Lanka semdanger rongnung North East Region nungi Senior Under Officer (SUO), Mejungsungkum Longkumer, Kohima Science College, Jotsoma, NCC Unit No1 Nagaland Air Squadron kija liasü.
Parnoki tan Sri Lanka semdangdang Sri Lanka sokar lenirtem aser Chief of Defence Staff; Army, Navy aser Air Force nungi Commanders den par tesepti nung ajurutepba den Sri Lanka nung tentetba raliwalitsü, tamangba yimsü aser puti otsü den sentakba tongti tesemtem semdang.
Cadet-temi kümshi ayonga agiba annual passing out parade nung shilem agiba den Sri Lanka nung ayonga agiba tongti NCC camp, ‘The Herman Loos & De Soysa Championship Trophy’ nunga parnoki densema liasü.
Kasa sentong nung Sri Lanka Defence Secretary-i tetemsü Cadet-tem nem sempet aser naroküm agütsüba osang jangjaogo.
YEP ya sendaktepa aliba linüktem nung tentetba NCC/ Sorkar/Youth Orangizations nungi teloktemi aroki agiba tongti sentong ka lir aser taküm Sri Lanka nung ayongba YEP sentong nung SAARC nung züngsemba linüktem nungi nisung noklang dak temai shilem agia liasü.