Nagaland nung 2 buba e-Summit tenzükogo

Kohima, November 28 (TYO): Hombarnü Indira Gandhi Stadium Kohima nung anogo ananü atema 2 buba e-Naga summit 2016 tenzükogo.
Iba sentong ya ‘Towards making the state of Nagaland the next IT hub in South east Asia’ omen nung ajemdaker agir. Tanü sentong nung tongti tesemdangerji Nagaland Angh, P.B Acharya liasü aser IT&C Transport & Civil Aviation & Border Affairs Minister, P. Paiwang Konyak-i tetushi süa jaoker ama shilem agi.
Information Technology (IT) tejakleni aoba ajanga Internet aser mobile connections talila küma aoer aser iba tensa nung nübortemi sorkar aser telok balala dang nungi osangtsüsang aser teyari balala angutsü imlar, ta Nagaland Angh, P. B. Acharya-i ashi.
“Information & communication technology ajanga nübortem yaritsü aser tenzüktsü asoshi lenmang aisü lir” ta paisa shisem.
Department temi Information and Communication Technologies (ICT) amshia maparen inyaktettsü. Nübortemi sorkar indang teyari balala agitettsü atema iba ya tongti süa amshitsüla, ta Acharya-isa tebilemba lemsatep.
IT literacy jenjang ajungkettsü, e-governance indang tajangzük metetdaktsütsü, Department balala tsüngda tesentaktep jungdaktsütsü, sorkar maparen ajungkettsü aser tanga state tem dang nungi mapa tajungtem ajizüka benshitsü atema State sorkari ICT amshitsüla, ta paisa ayongzük.
Sentong nung Estonia Tir atema Advisor, Dr Liia-i o jembidang, tawa Computer Society of India-i Nagaland nem e-Governance nung tajungtiba ta tenüng jaloktsüba atema tenüngsang agütsü.
“e-Nagaland ya Nagaland tejakleni aotsü atema lir aser iba indang alizüngji ‘modern information & communication technology’ nungi tajungtiba agizüktsü atema lir” ta laisa ashi.
Nagaland Chief Secretary, Pankaj Kumar-ia ashiba agi, Centre sorkari Digital India maparen ajanga digital infrastructure & e-governance ajungkettsü meranger.
Centre sorkar nungi angazüka Nagaland Secretariat nung biometric attendance system tenzükogo.
Ano, Dimapur nung alirtemi online ajanga electricity bills agütsütettsü aser maneni iba inyakyim ya tanga jilatem nunga tenzüktsü, ta Pankaj Kumar-isa metetdaktsü.
Mezüng anogo plenary sessions agidang, Assembly Speaker Chotisuh Sazo, Minister Dr Neikiesalie Nicky Kire, Minister CL John, Parliamentary Secretary Deo Nukhu, Dr Miia & Founder of Estonia e-Governance Academy Dr Ivar Tallo nungeri “What role can law makers play in promoting IT and e-Governance” onük nung jembi.
Ano, “Can media be an enabler in promoting IT and e-Governance” onük nung Eastern Mirror Yimozülur, K Wapong Longkumer, Senior Journalist H Chishi, Media Professional Highland Dawn Media Bob Swaggerty, Senior IANS Reporter, New Delhi Rupesh Dutta aser Administrative Staff College, India, Dr. Shahaida nungertemi jembi.
Tatemsa, “How can civil societies and students promote IT and e-Governance” onük nung o jembirtemji, Nagaland Women Commission chairperson Temsula Ao, taoba NSF president Achumbemo Kikon, Naga Hoho adviser Kevilietuo Kiewhuo aser NSF general secretary Boveio Poukai Duo nungertem liasü.