Nagaland nung 2buba National Naturopathy Day mungogo

Kohima, Yimpoksüi/November 19 (TYO): Directorate of Health and Family Welfare, Nagaland kübok National AYUSH Mission pur Hombarnü “Mahatma Gandhi and nature cure” omen nung ajemdaker 2buba National Naturopathy Day mungogo. Iba sentong nung Principal Secretary R. Ramakrishnan alakteta jaoker liasü. Iba sentong ya Chedema village Kohima Malo-o Indoor Stadium nung agia liasü.
Iba anogo AYUSH Mission, Nagaland-i achaayanga poster competition, stadium nungi Chedema Peace Camp tashi tsüngsa jajaba aser sun bath sentong ayongzüka agi.
Sentong nung o jembiba mapang Ramakrishnan-i, lokti tashidak nungi jenboa anema litettsü atema libaliro tajung benshitsü ayongzük. Paisa, India srokari AYUSH systems of health care ajungkettsü atema 2014 küm AYUSH ministry amenok ta ashi.
Principal Secretary-i ashiba agi, AYUSH Hospital tem ajanga state nung district ajak sentepdakteptsü.
Mi nung aoba shi aser moko achiba densema tim chiajem masüba ajanga Nagaland nung cancer tashidak kanga bulua adoker ta shia pai AYUSH system benshiba ajanga nüburtem arishia litettsü, ta ashi.
“Asen temang nungi mi agintsü atema inyakyim ka sülen angidaktsüla,” ta paisa ashi.
Maneni principal secretary-i, sentong nung college ti nungi dena aliba kaketshirtem dang moko achiba doktsütsü aser libaliro tajung benshitsü atema osang proker ambassadors kaka akümtsü ajungshi.
Kasa mapang nung State Nodal Officer, National AYUSH mission, Nagaland, Dr Seyiekhrietuo John-i ashiba agi, naturopathy ya physical, mental, moral and spiritual planes dak ajemdaker inyakba inyakyim ka lir aser iba ajanga tashidak nokdangtsü, aneptsütsü aser tajungba küma yanglushitsü tashi lir.
Nature cure ya taküm anema alitsü asoshi art aser science lir aser kanga junga rajemer aliba philosophy dak ajemdaker mozü mamshi taneptsü agütsüba inyakyim ka lir, ta paisa ashiba den health aser tashidak aser principles of treatment dak sendakba nung parnok indang jurila tangatetba aser inyakyim lir, ta ashi.
Paisa, Kohima district atema yipden 50 aketba AYUSH hospital ka yakta Chakhabama anasa lapoktsü aser Mokokchung aser Longleng district nung AYUSH hospitals yanglutsü atema tang tinyakdak lir ta ashi.
Poster exhibition takokertem rongnung; 1st – Mürhelü Vero (Ruzhukhrie Government Higher Secondary School, Kohima), 2nd- Khekiho Kinny (Mount Olive College, Kohima), Elivi Swu (Don Bosco College, Kohima), Megosietso (Don Bosco College Kohima), Limatula (Mount Olive College, Kohima) aser Vekuheto (Don Bosco College, Kohima), 3rd – Viheto (Don Bosco College Kohima), Rachel W. Tsanglao (Baptist College Kohima) aser Wungkahow Ramoor (Ruzhukhrie Government Higher Secondary School, Kohima) nunger densema lir.
National Naturopathy Day sentong ya Assistant Director (AYUSH) Dr T Bendangtula lenisüba kübok aka aser CBC Pastor Razouvolie-i sarasademer tenzük. Sentong nungsa President Barazou Krotho, Kelezhatuo Medom-i o tatsüka jembi aser State Laison officer NSS, Zeneikho-o Benedict-i tepela anküp o jembi.