Nagaland nung 65 buba Cooperative Week amunger

Kohima, Yimpoksüi (November) 20 (TYO): Mongulbarnü Nagaland nunga linük den külemi 65 buba All India Cooperative Week amung aser iba mapang cooperative society tem dang lokti aser rongsenkettsüng ajangzüktsü atema sentongtem yanglutsü ayongzük.
Iba sentong ya Assistant Registrar of Cooperative Societies indang office ajanga ayongzük.
“Nagaland nung aliba cooperative society temi rongsenkettsüng tsütsü tajangzük angutsü atema sentong tajungtem yanglutsüla, ibaji ajanga state indang GDP ajangzüktsü” ta SDO (Civil) Sadar Kohima, Lonsasen Lotha-i ashi.
Cooperative society temi züngsemtem ket nung aliba tera bendener teimba züintettsüsa mapa inyaktsü atema alizüng tejangja aser sentongtem yanglutsüla. Talisa packaging aser branding timi inyaka product tem ajungkettsüla, ta Lonsasen-isa ashi.
State sorkari tazünger lanur ajak nem mapa magütsütettsü anungji tazüngertem longjemer cooperative society tentettsüla aser ajak ajangzüktsü atema külemi mapa inyaktsüla, ta SDO (Civil) Sadar Kohima-i ayongzük.
Sentong nung Cooperative Society (SICS) nung Senior Inspector, Vefuyi Vero-i Cooperation Department kübok sorkar indang scheme balala osang metetdaktsü.
Scheme tem rongnung Integrated Cooperative Development Project, Rashtrya Krishi Vigyan Kendra aser Nagaland State Cooperative Bank dena lir, ta pai ashi.
Hopta tashi Cooperative benjung amungdang cooperative temi takok anguba otsütem lemsateptsü, parnoki tongtetbatem sayutsü aser tarutsü atema sentong yanglutsü maongka angur, ta Project Officer National Cooperative Union of India, Kohima, Ketholeno-ia ashi.
SICS Vikosielie Nagi-ia ashiba agi, cooperative society ya rongsenkettsüng, lokti aser sobaliba taginübatem atongtsü atema nisungtem longjemer tentetba telok lir.
Nagaland nung Cooperation Department ajanga sorkari cooperative sector ajungkettsü atema tongtipang mapa inyaker, ta Nagi-i ashi.
Sentong nungsa PAR MPCS Ltd Kenuozou, Vitho Industrial CS Ltd Sechü Zubza aser Touphema MPCS Ltd. teloktemi parnoki takok ngua inyakba mapatem metetdaktsü.
Sentong nung mendenji SRCS Kohima, Talikala Jamir liasü, Deputy RCS i/c ARCS Kohima Anthony N Yhome-i tesentepertem pela agizük aser SICS Asasola Longkumer-i anküp tepela o jembi.