Nagaland nung Aam Aadmi Party (AAP) ajemoker

Dimapur, January 30 (TYO) : Nagaland nung tetsüng ajemoka national political party Aam Aadmi Party (AAP)-i Honibarnü Dimapur nung Youth Wing, Nagaland tentetogo.
Tanü Hotel Saramati nung AAP National executive member aser Observer in-charge of Northeast Habung Payeng-i ashiba agi, party indang nükjidongji sorkar ketdangsübaren nung ochimashi agientsü aser temelenshi ka bener arutsü atema lir.
Nagaland nung alternative party mali aser iba jagi AAP-i Nagaland nung alternative political party ka ama inyaktsü. Nagaland nung alirtemi party indang tesayuba aser tangatetba agizüka anidaktsü imlar, ta Habung Payeng-isa metetdaktsü.
Paisa ashiba agi, kobi melii Nagaland nunga parent AAP body, women wing aser students wing tentettsü.
Tanü senden nung Youth Wing, Nagaland tenteta aotsü atema district 11 nungi züngsemtem shimteta preparatory/ interim committee ka tentetogo.