Nagaland nung AFSPA maneni benoker

Dimapur, July 1 (TYO): Nagaland nung June 30, 2020 nungi tenzüker ita 6 atema Armed Forces Special Powers Act (AFSPA) ozüng benshitsü atsülangogo.
Centre sorkari Nagaland ya ‘disturbed area’ ta sangoktsüba sülen AFSPA ozüng maneni alitsüba metetdaktsü.
Nagaland state ajunga nung tensa majung aser lendongi aitsüsa lir, iba jagi civil ketdangsübaren nung armed forces-i yariteptsü nüngdaker ta Centre sorkari lemtetogo, ta Home Ministry sangdong ka nung metetdaktsü.
Nagaland nung AFSPA ozüng ya küm 60 tema shi benshia arur. Nagaland nung loktitentet aikati AFSPA ya tashiyim aketba ozüng ka anungji agientsüla ta takhangba agüjaka, tensa majungba tenüng nung ajemdaker Centre sorkari maneni benokogo.
AFSPA ajanga armed forces nem nisung mashi ka mita aotsü aser aputsü aser ano nüngdak dang süra tensa azüoktsü atema injang akhatsü tashi agütsür.