Nagaland nung Air Cargo Services tenzükogo

Dimapur, March 2 (TYO): Nagaland chief minister Neiphiu Rio-i Mongulbarnü Dimapur airport nungi mezüngbuba Air Cargo Services tenzüktsüba noksa nung angur.

Dimapur, March 2 (TYO): Nagaland chief minister Neiphiu Rio-i Mongulbarnü Dimapur airport nungi mezüngbuba Air Cargo Services tenzüktsüogo.
March 2, 2021 nü CM Rio-i Dimapur Airport nungi perishable, non-perishable fruits & vegetables aser oset cartoon 111 bener yok.
Iba mapa ya Department of Horticulture, Nagaland aser Airport Authority of India külemi yaritepa inyaker aser airline partners ji Air India aser Indigo lir.
“Nagaland nung ali rongsen talubosa moaja lir aser tsünüsenbongtsü aika adoker. Asenoki aika tsünütettsü lenmang sadema lir, saka air cargo services maliba ajanga tsünüsenbongtsü aika tsünübaji amajok dang akümer” ta Rio-i ashi.
Air Cargo Services ajanga shishilembaba maparen tulu inyaktettsü. Iba ya aluyimertemi aser entrepreneurs atema tayongzükba tulu ka lir” ta paisa ashi.
Department of Agri & Allied-i alu mesüra pilot basis nung inyakba dang masü saka entrepreneurs-i supply chain nung yariteptsü atema tashi agütsütsüla, ta CM Rio-isa ashi.
“Aluyimertemi tsünütetbatem meraksadang tekaratiba nung air cargo station tongtsütsüla. Aluyimertemi aser entrepreneurs-i tajungba shishilembatsü atema tesayubatem agütsütsü nüngdaker” ta paisa metetdaktsü.
Horticulture & Border Affairs Advisor, Mhathung Yanthan-ia sendaka alir ajaki iba facility nungi tajangzük agia rongsenkettsüng jenjang tajungba akümtsü ayongzük.
“Nagaland nung Air Cargo Services tenzükba ajanga state indang rongsenkettsüng dak sendakba maparen nung tulu ka kongshitsü amanger,” ta Mhathung-isa ashi.
Airport Authority of India-i Dimapur nung infrastructure tajungba kümdaktsütsü atema kanga meranga inyaka arur, ta Regional Executive Director, Airport Authority of India, North East region, M. Suresh-ia ashi.
AAI-i Dimapur nung cargo service terminal dena terminal building tasen ka yanglutsü sentong lir. Iba nung modern facilities ajak alitsü. Anungji state sorkari additional aser terminal buildings tasen yanglutsü yaritsüla, ta M. Suresh-isa metetdaktsü.
“Tsünüsenbongtsü shishilembatsü atema regulatory body ka tentettsüla. Anogoshia, Air India aser Indigo tayimtsütem ajanga Nagaland nungi tanga state temi tsünüsenbongtsü metric tons 2 bener yoktsü” ta Horticulture Department Director, Dr Elithung Lotha-ia metetdaktsü.
Iba sentong nung mendenji Commissioner & Secretary, Horticulture Department, Anenla T. Sato liasü aser Thilixu Village Baptist Church, Dimapur Senior Pastor Rev. Dr. Hevukhu Achumi-i meshiteta sarasadem.