Nagaland nung ali amshiyim sentong yanglutsü

Kohima, Aug 23 (TYO) : Nagaland nung alu tajungba ayimtsü asoshi ali amshiyim indang shisadanga sentong yanglua inyaktsü atema distrct ajak nung Participatory Land Use Planning (PLUP) tenteta inyaktsü aser Lang Use Committee (LUC) shimtsü nüngdakba indang tanü Mongolbar nü de Oriental Grand hotel, Kohima nung “state level consultative workshop” ka aliba mapang jembia liasü.
Iba ‘workshop’ sentong ya United Nations Development Programme aser Nagaland Soil & Water Conservation department nati longjemer ayongzükba sentong ka liasü. Iba sentong nung Agri aser Allied department ajak nungi tekolak purtem adenshia shilem agiogo.
Iba senden nung shisalemsatepba o kaji, tesem shia kechi lu ayim nung ajunger, ibaji apia department-i yaritsü aser district shia nung Jhum Resources Management Committee (JRMC) kaka shima item sentongtem ketdang asütsü.
Iba senden nungsa lemtetba kaji LUC nung alirtem nemji department-tem nungi mongin nisungtemi soil mapping aser GIS mapatem nung tesayuba agütsütsü aser nübortem nem PLUP indang angatetdaktsütsü.
Iba sentong tetenzüklen PLUP ajanga Mokokchung, Mon aser Wokha district-tem nung nübortemi inyakba ajanga tajangzük anguba indang UNDP Documentation Specialist (International Consultant), Dr Andras Darabant-i “power-point presentation” ajanga sayua liasü. Paisa ashiba agi, PLUP inyakyim ajanga akhidang aluyimba maparentem asentenshidakja kümdaktsüogo aser yimtsün g kar nungbo sensakertem jenjang tajungba kümogo.
PLUP ya tangang tenzüker asünungji, LUC tenteta aotsü asoshi government-i yaritsüla ta
Dr Andras-isa ashi.
Ina senden sentong anisang, Commissioner & Secretary aser APC Nagaland, Wb.Imkonglemba Ago-i ashiba agi, Nagaland atema PLUP policy yangludanga lira ser ibaji Naga nunger kin shia pei oshi nung meyipzüker külen kin shia den shisalemsatepa aotsü.
Iba kasa sentong nung UNDP New Delhi Research Associate, Anushree Battacharjee-ia o tatsüka jembia liasü.