Nagaland nung alirtemi memetet Naga yimten melatettsüla: CNSA

Dimapur, March 02 (TYO): Tawa Manipur nung election nüboyim sentong nung jembidang, ato kilonser Narendra Modi aser kilo kilonser Rajnath Singh nati 2015 küm August 03 nü India government o NSCN-IM na tsüngda tangatettep ken o ka “Framework Agreement” renemba agi, tang aliba Manipur artsü memelenshitsü aser tangatettep renemba ken o nung Manipur ta kena shia mali ta metetdaktsüba osangji kanga süoki ia bilemdangtsüba mapang ka agi tongogo, ta Central Nagaland Students’ Association (CNSA) purtemi metetdaktsü.
India government aser NSCN-IM nati Naga yimten latettsü jembiba maparen nung nübortem den shisalemsatepa meinyakra, oagi Delhi mesüra Kohima nung alir kija jembir arubaji Nagaland nung alir Naga nungertemi magizüktettsü ta CNTC-isa metetdaktsü.
“Centre-i Manipur, Assam aser Arunachal Pradesh state-tem artsü nung mekongshitsü süra, ibajibo Naga nunger ashioktsüba ken o ka asütsü aser tang Naga yimten ken o jembiba ya Nagaland asoshi dang süra Nagaland nung alirtemi jembitsüla ta CNSA-isa metetdaktsü.
India government o NSCN-IM na pronglai 3rd August 2015 anogo nung renemba ken o ji kechiba nübortem dang mesayutsü meranger, kechiyong nübortemi mangu aser memetet ser bener aruba telatetbajibo asangsang nung nübortemi magizüktettsü ta CNSA-isa ashi.
Nagaland nung aliba Naga nungertemi pei amshitsü temzüng ozüng yanglutsü aser menüngdakba ozüngtem yanglushitsü koka lir, anungji Nagaland atema ken o latettsü asoshibo Nagaland nung alir Naga nungertemi jembitsüla ta CNSA sangdong nung tir Charles Lotha aser tongti zülur Yimlanger Jamiri nati metetdaktsü.