Nagaland nung ‘Ambassador for Girl Child’ tenzükogo

Kohima, April 18 (TYO): Beti Bachao Beti Padhao (BBBP) project kübok Hombarnü Nagaland nung ‘Ambassador for Girl Child’ tenzükogo.
Tanü Secretariat Conference Hall,  Kohima nung Administrative Heads of Department aser Heads of Departments senden amendang Chief Secretary,  Pankaj Kumar-i ‘Ambassador for Girl Child’ tenzüktsü, aser pa mezüng ambassador asütsü.
BBBP ya 2015 küm January 22 nü Ato kilonser, Narendra Modi-i tenzükja liasü.
Ambassador for Girl Child ya Nagaland state BBBP-i tenteter.
Ambassador for Girl Child mapatong ya shisaliok atema maongka mangur tetsür chanutem atema lir.
Ambassador ka ama pai tetsür chanutem shisaliok tajung atema inyakba dang masü saka tetsür chanu ka taküm jenjang tajungba litettsü atema inyaktsü.
Kaket tila ka nung, “Iba act ajanga onoki tsürabur ajak dang tanga tsürabur ka yaritsü asüngdanger; mangdang ataloktsü atema jala ka nem maongka agütsütsü atema inyaktsü asüngdanger. Shisaliokji ajaki ngutettsüsa asenoki maongka agütsüdi,” ta shia lir.
AOGC scheme kübok asenoki inyaktsü akokbatem indang power point presentation ka agütsüdang State Resource Center for Women Secretary, Daisy Mezhur-i, ajaki tetsür chanu ka aser la shisaliokji koda tongtibang, iba indangji tapet sabang ajak nung jembitettsü, ta ashi.
Girl Child logo ji printing material ajak nung adoktsü, IECs-i awareness agütsütsü, iba den külemi “Ambassador Scholarship,” ajanga department balala nung AHODs aser HODs-i tetsür chanu ka la nükjidong atangji nung ataloktsü atema nungita yaritsü maongka angutsü, ta laisa ashi.
“‘Ambassador Scholarship’ atema temulungler ajaki inyaktsü akok,” ta Daisy-isa shisem.