Nagaland nung Animal Genetic Resources sentong agi

Hotel Japfu Kohima nung Animal Genetic Resources of Nagaland sentong nung  Parliamentary Secretary, S. Chuba Longkumer-i o jembiba noksa nung angur.

Dimapur, November 18 (TYO) : Local shirurutem jungjunga bushiba sülen ang tanga azütem den meyokteptsüla. Ibaji ajanga local shirurutem wazüka yutettsü aser tajungba bushitettsü, ta Animal Husbandry & Veterinary Services (AHVS) Parliamentary Secretary, S Chuba Longkumer-i ashi.
Hokolbarnü Hotel Japfu nung “Animal Genetic Resources of Nagaland” sentong nung o jembidang, Chuba Longkumer-i ashiba agi, “technologicy tsütsü kanga dang kara ainba putu ka nung asenok ali, anungji professional temi teti bushitsüla aser alima ainba den liromedema anidaktsüla.”
India ya temeyoktep aliba linük ka lir aser asen linük nung shiruru tapu balala lir. Anungji asenok shiruru tapu balalatem kanga junga bushitsüla. Iba mapa nung National Bureau of Animal Genetic Resources (ICAR-NBAGR)-i maneni State AHVS Department yaritsü imlar, ta paisa ashi.
Parliamentary Secretary-isa Mithun, Jharnapani nung ICAR-NRC-i Mithun metsüba aser Mithun o Thotho dena Nagaland nung anguba shirurutem bushitepba atema tenüngsang agütsü.
SASRD Medziphema (APM Department) aser NBAGR “tenyi vo” nati registration asüba atema Chiba Longkumer-isa parnok danga pelaba metetdaktsü.
Tanü sentong nung ICAR-NBAGR Karnal Director, Dr. Arjava Sharma-i o jembidang ashiba agi, parnoki Nagaland nung animal genetic resources aliba angazüktsü atema iba sentong ayongzüka agir.
Tesüiba mapang Nagaland nung shiruru aika lir ta Naga nungeri memetet liasü aser iba jagi züluoka mayuba shirurutem aika samar asütsü, ta Nagaland AHVS Department Director, Dr. I P Khala-ia metetdaktsü.