Nagaland nung April 12 tashi shisaliok rejutem shibangtsü

Dimapur, March 16 (TYO): Nagaland nung university tem dena shisaliok reju ajak April 12, 2020 tashi melapoktsü atema sorkari tetuyuba agütsüogo. Dimapur, March 16 (TYO): Nagaland nung university tem dena shisaliok reju ajak April 12, 2020 tashi melapoktsü atema sorkari tetuyuba agütsüogo. Ajisüaka, tang tagidak CBSE, CISCE aser tanga board tatidangtembo agitsü. Hombarnü Kohima nung Chief Minister Neiphiu Rio-i ayonga amenba senden ka nung iba telemtetba agia liasü. Iba senden ya coronavirus prokshiba tebilemtsü atema ayonga amen aser CM Rio-i “nübortem kümzüka ayutsü atema külemi telemtetba agitsü atema senden ayong” ta ashi. Paisa, MLA tem dang pei pei district-i aotsü aser District Task Force den sendentem amentsü atema ayongzük. Senden nung Chief Secretary, Temjen Toy IAS aser Health and Family Welfare Principal Director, Dr. Vizolie Suokhrie nati Nagaland nung Covid-19 atema maparen renema aliba osang metetdaktsü. “Iba tashidak atema tongtipang mapa anaji- Prevention aser Preparedness lir. India sorkari tuyuba ama state H&FW department-i mapa ajak inyakba atema pelar. Ajisüaka, iba tashidak atema nisung shiai pei pei sasa kümzüka ayutsüla,” ta Chief Secretary-i ashi. Nagaland nung iba tashidak anema inyakba mapa akangshitsü atema mapang shia Central department tem den video conference alitsü. Covid-19 agi shiranga asür teimba ka tango mesashitetba ajanga asüba liasü aser iba jagi Nagaland nung ventilators talila nüngdaker, ta Temjen Toy-isa shisem.Rural Development department-i yimtsüngtem nung Self Help Groups ajanga osang tongteptsüla aser H&FW department-i iba tashidak noktangtsü atema inyakba nung yariteptsüla, ta paisa metetdaktsü. Nagaland nung tanü tashi nung Covid-19 aketer mesüra temulung melemi bilemba nisung ka dang puteta mali, ta Dr. Vizolie Suokhrie-ia ashi.Department-i district ajak asoshi Personal Protection Equipments aser Ventilators alitsü tenzükogo. Maneni shirangertem quarantine asütsü atema mozü ki balala shima lir, ta paisa shisem.Tanü senden nung onük aika benoka lemsatepba sülen item telemtetbatem agia liasü:1. Nagaland state nung shisaliok reju aser university ajak March 17 nungi April 12, 2020 tashi shibangtsü. Ajisüaka iba tenokdangba kübok tang tagidak CBSE, CISCE aser tanga board tatidangtembo madentsü. 2. March 18, 2020 nungi tenzüker tanga osang ka mesangdong tashi Nagaland-i tourist (Foreign and domestic) marudaktsütsü.3. Nagaland-i aruba entry points aser check gates ajak State Police force-i anüktsü. Iba mapa lemzüker nem H&FW department-i training agütsütsü. 4. Nagaland-i aruba kaketshirtem aser tangar ajaki Covid-19 helpline no: 7005435243, 9856071745, 7005539653 & Toll Free no: 1070 mesüra Email: nlssu.idsp@nic.in ajanga osang metetpelatsü.5. H&FW, IPR, NSDMA, School Education, NBSE, Rural Development, Police, Transport aser tanga line department tem nungi Covid-19 atema “Special Action Group” ka tentettsü. 6. Sorkari lokti sentongtem magitsü tuyuba ama nübortemi tashi angaa anidaktsü atema inyaktsü.7. Mini hornbills dena lokti aika adenshiba official functions & programmes malitsü. 8. Tang osang ka mesangdong tashi Tourists (Domestic/Foreigners) nem new/fresh Inner Line Permits agütsüba aser tanga telemsa ajak anena atatsü.