Nagaland nung arem-min aser shirurutem wazüka ayutsüla: PCCF

May 22, 2017 nü Capital Convention Centre Kohima nung International Day for Biological Diversity amungdang PCCF I. Panger Jamir, NSBB ketdangsertem aser kaketshirtem külemi agiba noksa angur.

Kohima, May 22 (TYO): Nagaland litsübo tilaka dang saka süngdonglidong aser shiruru balala aika lir, ta Principal Chief Conservator of Forest & Head of Forest Force, Department of Forest, Environment & Climate Change, I. Panger Jamir-i tanü ashi.
Hombarnü Capital Convention Centre nung Nagaland State Biodiversity Board (NSBB)-i ayongzüka International Day for Biological Diversity sentong nung jembidang I. Panger Jamir-i ashiba agi, “Nagaland nung Tragopan, Mithun, Naga mersü tashitiba, rhododendron talangtiba, tsük talangtiba, kanga manguba orchid- Red panda, Bulbophyllum, wild rose, wild pepper amala lir aser Nagaland ya the Indo-Burma biodiversity nung shilem ka lir.”
Asen state nung angiosperms tapu 2400, angiosperms tapu 9, orchids tapu 340, aou tapu 22 lir aser shirurutem rongnung mammals tapu 100 den tema, ozü tapu 400 aser tanga shirurutem aika lir, ta paisa shisem.
“Asenoki asen arem-min aser idakji aliba shirurutem wazüka aser kümzüka ayutsüla kechiyong aika samaa odar. Asenoki tang meinyak nungbo, taruba putu tashi nung aika samadoker alitsü,” ta I Panger-isa ayongzük.
Nagaland nung community biodiversity conservation maparen tenzükogo aser itemji Sendenyu, Kanglatu, Dikhu green zone aser Khonoma nature conservation amala nung inyakdar, ta paisa shisem.
Sentong nung NSBB chairman T. Lotha, IFS (Rtd)-ia o jembidang, alima nung meimchir alitsüba arem-min aser idakji aliba shirurutem dak keta lir. Asenoki arem-min aser shirurutem melii melitettsü, ta ashi.
United Nations General Assembly-i 2017 küm ya ‘International Year of Sustainable Tourism for Development’ ta sangoktsüogo aser iba atema United Nations World Tourism teloki ketdangsüa mapa jenti inyakdar. UN-i shimtetba omen den liromedema “Biodiversity and sustainable tourism” omen shim.
Sentong nung NSBB member Prof. Sapu Changkija-ia kaketshirtem ayongzüka o jembi.
International Day for Biological Diversity sentong nung Kohima district kübok school 16 nungi kaketshirtem aden. Sentong nung Kohima Harvest Church pastor, Swedesul Luho-i temoatsü meshia sarasadem, The Vineyard School kaketshirtemi ken ka aten aser Keneizeno Seletsu-i anküp tepela o jembi.