Nagaland nung asayar 209 nem tetushi agütsü

Advisor, Youth Resource aser Sports Er. Zale Neikha den Coach senpet agütsüba sentong nung tangokba noksa nung angur. (Kohima, Aug. 29, 2019)

Kohima, Luroi/August 29 (TYO): National Sports Day aser Fit India Movement amenokba anogo Nagaland nunga national aser international jenjang nung saisapong balala 14 nung takok tajung angur asayar parnok 209 nem tetushi agütsüogo.
2016-17 aser 2017-18 küm medal 311 ngutetba atema tetushi ya agüja liasü. Medal tem rongnung gold 83, silver 93 aser bronze medal 135 densema lir.
State Sepaktakraw team aser coach twmi India tenüng nungi Asian Games nung asemben tashi shilem agiogo aser iba atema parnok nema tetushi agüja liasü.
Iba sentong ya Department of Youth and Sports-i ayongzüka Indira Gandhi Stadium nung agiogo aser kuli kaket den senpet sen lakh 50 tashi asaya balala nung takok tajung angurtem nem agütsüogo.
Youth Resources and Sports Advisor aser MLA Zale Neikha-i sentong nung mapang asayar aser ketdangsertem den o jembiba mapang, linük ajunga den liro medema nagaland nunga ‘National Sports Day amunger, koba Hockey asayar mongin Major Dhyanchand Singh asoba anogo nüngtem nung amunger, ta ashi.
Paisa, iba anogo ya saisapong koda tongtibang iba indang metetdaktsütsü asoshi amunger ta ashi.
Takok tajung angur aser senpet agizükertem nem tenüngsang agüja Neikha-i ashiba agi, iba tetushi tila ka agütsüba ajanga lanur asayartem ajungmesotsü imlar.
Advisor-isa lanur asayartem dang pei libaliro azüoka temaba jenjang nung takok tajung angutsü, professional aser medal kokteter kaka akümtsü asoshi meranga inyaktsü ajungshi.
Nagaland nung PDA sorkari state nung asayar tajungtem ajungkettsü, ajungshitsü aser teyari agütsütsü bendanga agüja inyakdar aser state nung saisapong ya jenjang temaba ka dangi anir atutsü nükla lir, ta paisa ashi.
Kasa mapang nung Advisor-i, under-14 tebur aser tetsürtem atema Kohima nung September 4 nü nungi tenzüka tang mezüngbuba Football Coaching angati agütsütsü sentong aliba metetdaktsü.
Paisa, coaching ya Bodbarnü aser Honibarnü shia nikongtsütsü 3:00 ako nungi agütsütsü ta ashi.
Maneni Neikha-i ashiba agi, Department-i tanga asaya nunga ibala mesükba maparen benoka inyaktsü aser state kübok tanga district nunga lanurtem ajungketa temaba jenjang tongtetdaktsütsü asoshi asaya balala nung teyari agütsütsü.
Iba inyakyim ajanga tarutsü nung Naga nunger tetsür tebur temi saisapong balala nung national aser international level nung takok tajung angutsü imlaba pai lemsatep.
Neikha-i ashiba agi, taküm Nagaland nung ‘National Sports Day’ aser ‘Fit India Movement’ lokteper amunger. Department-isa 2018- 2019 küm tem nung saisapong balala nung takok tajung angurtem nem senpet agütsütsü achaayangdar ta ashi.
Advisor Youth Resources & Sports den külemi iba sentong nung Advisor DUDA, Bongkhao arua aden.
Deputy Superintendent of Police aser Olympian, Chekrovolu Swuro-ia sentepa aliba lokti ajungshi aser parnok dang pei tata asaya nung temaba jenjang tongtettsü atema meranga inyaktsü aser azüoka alitsü ajungshi.
Tanü sentong ya Secretary Youth Resources & Sports, Lhouchalie Viya lenisüba kübok agi aser Chaplain Rev Kuzierang Tho-u-i temoatsü meshizüka sarasademer tenzük. Kasa mapang nung Viriako Chase-i ken tajung ka aten aser Director Youth Resources & Sports, Akumla Chuba-i tepela anküp o jembia liasü.