Nagaland nung Ashok Leyland generator angutsü

Dimapur, Oct.09 (TYO) : Nagaland nung alirtem asoshi osang tajung kaji tang nungibo Ashok Leyland company-i yangluba tashitait aser ola madoki electric power agütsüba generator 5 KVA nungi tenzüker 2,250 KVA tashi angutsü.
Tanü Mongolbar nü Dimapur nung West Police station anasa iba ama nüngtugu Ashok Leyland company-i yangluba generator ayokba tesem ka Jamir Engineering ajanga lapokogo.
Ashok Leyland Generator ya India nung khu abenba gari tulu yangluba Ashok Leyland company-i yangluba lir anungji iba generator ya tashitait aser ola ajema agütsür aser küm ana agüja aliba warranty mapang süir külena küm aika shitak amshiteter ta tanü iba ayokdak tesem semzüka jembidang company nungi arurtemi metetdaktsü.
Iba generator nung diesel totzü atsüker aser yanglushitsü nüngdak adokba mapanga teyanglutsür mapang shitak nung arua yanglutsütsüsa teti nisung den oset shitak alitsü ta parnokisa ashi.
Tanü iba generator ayokdak tesem ya Dimapur Deputy Commissioner, Wb.Sushil Kumar Patel arua semzüktsü aser Dimapur Ao Baptist Arogo nung Associate pastor Wb.Toshi Longkumeri meshiteta sarasademtsü.
Iba sentong nung Jamir Engineering kibur Wb.Pirong J-i tarurtem dang pelaba o ashi aser akok tashi Ashok Leyland generator amshirtem ajak temulungsüdaktsütsüsa inyaktsü nangzük.