Nagaland nung azü shi nokdangtsü akok

Kohima, July 10 (TYO): Nagaland sorkari ozüng alema azü shi chiyungtsü ama amshiba ya nokdangtsü akok, aser iba atema Urban Local Bodies (ULBs) nem tetuyuba kar agütsüogo.
Tang tashi nungbo iba atema state Cabinet-i telemtetba kecha agia mali saka Joint Secretary, Obangla Jamir-i agütsüba shidi ajanga sorkari Directorate of Municipal Affairs Joint Director dang, ULBs ajak dang shiruru meima anepalutsü atema sangdongang aser azü tepsetba aser shi achiba anentsü atema tuyuang ta shiogo.
Municipal Affairs Department (MAD) dang azü taküm ayokba aser azü shi ayokba bazaar anentsü mepishiba den külemi shirurutem meima anepalutsü atema sangdongang ta shiogo, ta Joint Secretary-i ashi.
Iba sülen May 3 nü MAD Joint Director aser Head of Department, A. Zanbemo Ngullie-i shidi ka ajanga state Municipal aser Town Councils nung ketdangser 23 nem tetuyuba balaka magütsüi Joint Secretary indang shidiji dang agütsüogo.
Nagaland nung shi tapu balala  achir  jenti lir aser item rongnung azü shi ya kanga sapua chiteper.
State nung azü shi seret ka nung sen 300 dak tema lir aser state nung hotel aika nung, talisa state yimtiba, Kohima aser shishilembaba tiyongtsü, Dimapur nung aliba hotel tem nung azü shi angur.
State adener tangalen nungia azü bener arur, kechiyong azü shi nung mozü tajung lir aser nutrition lir ta züngshir.
Osang angazükba agi, Assam nungi advocate, N M Kapadia-i state sorkar nem legal notice ka benokba sülen azü tepsettsü aser shi achitsü atema azü apuba nokdangtsüsa akümer.
Legal notice ka ajanga advocate-i ashiba agi, an shi aser napong shi den kasa azü shi ya chiyungtsü ama yimjak nung ayoker aser azü shi nung iron aliba den tashitak kar atema mozü ta züngshia azü temang shilem ajungaji amshir.
Iba legal notice nung ajemdaker State Chief Secretary-i MAD, Veterinary & Animal Husbandry, Home, Health and Family Welfare ketdangsertem aser Kohima o Dimapur na nungi Deputy Commissioner tem den March 3, 2016 senden ka amendang MAD dang nüngdakba mera agitsü atema mepishitsü lemteta liasü.
Ajisüaka tang tashi nungbo state sorkar aser ketdangsertemi tetuyuba tejangja ka agüja mali, ta kasa osang ajangsa ashi.
Naga nunger chiyungtsü apir ULBs ketdangsertemi iba atema tetuyuba agütsütsü asü magütsütsü ibaji junga shisadangdar, ta kasa osang ajanga shisem.