Nagaland nung BJP-NPF-i terenlok mapa inyaktsü: Thaawar

Dimapur, June 09 (TYO): NDA sorkari küm ana yimsüsüba mapang inyaktetbatem metetdakja Social Justice & Empowerment Union Minister, Thaawar Chand Gehlot-i, Atal Bihari Vajpayee yimsüsüba mapang nung Northeast state tem nung terenlok atema ministry temeja ka liasü aser tang Ato kilonser, Narendra Modi-ia maneni Northeast nung terenlok mapa inyaker, ta metetdaktsü.

DONER Minister, Dr. Jitendra Singh state-i arutsü sentong liasü, saka ajungbena pa India Tir, Pranab Mukherjee South Africa-i miena aotsüsa akumba ajanga marutet.

Ita ka piyong sentong ‘Vikas Parv’ dak sentakba nung tanü Agri Expo site, 4th mile, Dimapur nung lokti senden nung jembidang Union Minister, Thaawar-i, “NDA sorkar yimsüsüba mezüng küm ana nung sorkari inyakba mapatem nüburtemi nguogo, aser tangbo nüburtemi iba sorkar dak tamang kanga akar,” ta ashi.

Pai ashiba agi, taoba Lok Sabha election nung BJP-i majority nguaka party-i teloktep party tem den senteper yimsüsür.

Paisa, Nagaland nunga BJP-NPF teloktepi state nung terenlok mapa inyaktsü, ta ashi.

Modi sorkari mapang ochimashi maliasü, anungji shiangaia ochimashi onük nung sorkar dang tasüngdangba makatettsü, ta pai ashi.

Taoba mapang sorkar aija pai, UPA-I aser UPA-II sorkar mapang nungsa ochimashi timtiba liasü, ta ashi.

Kasa senden nung Nagaland CM, TR Zeliang-ia, Modi lenisüba kübok NDA sorkar küm ana jungogo aser temelenshi aika aliba ajanga melung asür, ta ashi.

Küm ana nung rongsenkettsüng asentenshitsü aser kanga kara terenlok alitsü atema sorkari tongtibang mapatong aika benokogo, ta Chief Minister-isa ashi.

Iba sentong tetenzük nung Minister for Transport, Civil Aviation & IT, P Paiwang Konyak-i lokti pelaa agizük aser PWD (R&B) Minsiter, Vikheho Swu-i tepela anküp o jembi.

Iba sentong ya DAN Vice Chairman aser state BJP Tir, Visasolie Lhoungu lenisüba nung agi aser NLA Speaker, Chotisuh Sazo-i sarasadema tenzük.