Nagaland nung Cancer bulua adokba atema khuret abener

November 11, 2016 nü Capital Convention Centre, Kohima nung Nagaland Governor, P.B Acharya aser tangartemi National Cancer Registry Programme indang review senden nüngo sayatsüba noksa nung angur.

Kohima, November 11 (TYO) : Nagaland nung küm shia cancer agi shiranger nisung 600 den teimba puteter aser iba y public health atema tongtipang onük ka kümogo.
2010 nungi 2015 tsüngda Nagaland nung cancer agi shiranger 3161 putetogo aser parnok rongnung tebur 60.68% aser tetsür 39.32% lir.
November 11, 2016 nü Capital Convention, Kohima nung National Cancer Registry Programme indang XXXII annual review meeting nung iba osang metetdaktsü.
Iba sentong nung linük tesem balala nungi cancer specialist aser doctors 109 tashi arua shilem agir.
Iba senden lapokba sentong nung Nagaland Governor, P. B Acharya-i o jembidang, cancer nung mongin nisungtemi Nagaland state nung aliba mozü yangluba süngdonglidongtem research asütsü ayongzük.
Naga nungeri medical college ka aginür, saka faculty members-i iba tesem nung arua inyaktsü memulunger. Anungji, Nagaland ama tesem ka nung mapa inyaktsübaji tayongzükba ka ama agizüka inyaktsüla, ta P.B Acharya-isa ashi.
Linük nung education system indang jembidang, Acharya-isa ashiba agi, “India nung university balala nungi fresh graduates, scientist tem noklang aika adoker, saka tazüngertem jagi pei atema dang bilema inyaker aser ibaji ajanga nübortem timtemer.”
University temi lokti den putepba tesayubatem agütsütsüla aser ano lanurtem kolok nung skill development tangatetba sayutsüla. Parnok university nung züngtemter külen mapa bushirtem masü saka mapa agütsürtem asütsüla, ta paisa shisem.
Sentong nung Health & Family Welfare Minister, P. Longon-ia Nagaland nung cancer tashidak kanga bulua adokba atema Cancer treatment facility ka alitsüla, ta ashi.
Centre sorkari NHAK nung cancer centre ka lapoktsü atema senotsü agütsüba atema pelar aser cancer research centre ajaki yariba ajanga iba mapatong asangsang nung ataloktsü imlar, ta Longon-isa ashi.
National Centre for Disease Informatics and Research ICMR Bangalore Director, Dr. Prashant Mathur-i ashiba agi, cancer teimba adokba state ji Mizoram lir aser iba sülen by Arunachal Pradesh, Meghalaya aser Assam lir.
“Makamaitba, shia memetetba aser osang tejangja memetetba ajanga linük nung cancer yimtibaji North East lir” ta Dr. Kataki-isa shisem.
Dr Kataki-isa Northeast nung Cancer treatment facility peria maliba atema sasa bilemba olen ka shisem aser iba asoshi Nagaland governor aser H&FW minister nungeri Nagaland nung Cancer institute ka lapoktsü atema Centre den maneni jembitsüla ta paisa ayongzük.