Nagaland nung cancer case 3348 lir; kümshia 600 renloker

Kohima, Feb. 04 (Agencies): Kanga dang taoksatsü osang kaji, 2009 küm nungi 2014 küm tashi nung Nagaland nung cancer tashitak agi shiranger 3338 liasü, aser kümshia cancer tashitak agi shiranger tasen 600 agi timba akumer.
Brihostibar nikongdang Hotel Japfu, Kohima nung Cancer Society of Northeast (CSNE)-i ayongzükba World Cancer Day sentong nung National Cancer Registry Program osang metetdakja Principal Investigator, Population Based Cancer Registry, Nagaland, Dr. V. Khamo-i iba osang metetdaktsü.
Dr. V Khamo-i, “Nagaland nung kümshia cancer case züluokbaji: 2009 küm case 371, 2010 küm 534, 2011 küm 505, 2012 küm 662, 2013 küm 635 aser 2014 küm case 641 liasü. Item cancer case 3348 nungi case 2034 tebur aser case 1314 tetsürtem liasü,” ta metetdaktsü.
Nagaland nung terok cancer kanga buloa lir, aser ibaji shi takong/shikong aser metsü-ngo takong/metsüngashi tali achiba den külemi kidang süng tsüka mi apuba ajanga lir, ta lai ashi.
Tebur rongnung cancer tapu timbaji Nasopharynx cancer shilem 19.27 liasü, iba sülen tepok cancer shilem 17.43 aser Oesophagus cancer shilem 16.06 liasü. Ano külen tetsür rongnung cancer tapu timtibaji cervix cancer shilem 19.09, iba sülen tepok cancer shilem 13.64 aser mama cancer shilem 11.82 liasü, ta lai metetdaktsü.
Lai ashiba agi, anogoshia alima nung cancer tashitak tapu 200 dak tema puteter, aser kanga buloa putetba cancer taputemji- Oral cancer, terok, tepokpok, temesen, tepok, colorectal, teküp, prostate, mama aser cervix cancer lir.
Cancer tashitak atema taneptsü angutsü asü, ta asüngdangba langzüdang lai, “Küm 20 tejaklenbo cancer tashitak ya maneptsütettsü ta amanga liasü, ajisüaka tanübo medical science ajanga tasen aika purapitetogo aser anogoshia research jenti agidar. Mapang shitak nung tashitakji putetra khenyongi aneptsü,” ta ashi.
Maneni lai, cancer ya komo (tumour) nung ajemdaker stage pezü lemsaa lir. Mezüngbuba aser tanabuba stage nung taneptsü angutsü, tasembuba stage nung shiranger ka akumli anogo-mapang atsülangtettsü, ajisüaka pezübuba stage nungbo shiranger ka anepalutsüji kanga tasak akumer, ta ashi.
CSNE Tir, Lanuakum Jamir-ia, alima nung cancer case million 25 lir aser India kija nunga case million 2.5 shi lir, ta ashi.
Paisa, 2020 küm tashi nungbo ano shilem 50 agi timba akumtsü, ta metetdaktsü.
Dr. Khamo aser Lanuakum napronglai iba tashitak indang lanurtem aser yimtsüng nung alirtem nem rajema lidaktsütsü kanga nüngdak, ta ashi.
Iba sentong nung tetushi tejaoker, Kohima Deputy Commissioner, Rovilatuo Mor-i, tamalenbo iba tashitak ya atakatem tashitak ka ta züngshia aru, ajisüaka cancer awareness ajanga iba tanübo iba tangatetbaji melenshiogo, ta ashi.
2001 küm iba tashitak ajanga shiranger Retired Chief Secretary, Banuo Z Jamir-ia cancer tashitak den rarar takok anguba otsü lemsatepa liasü.
Sentong nungsa Divine Connection vocalist, Obed Kath, Dance United, Menguseü Soukhrie aser Chubainla nungeri shilem agia liasü.
Kohima Ao Church, Paramedical Pastor, Sentisashi-i sarasadema iba sentong tenzük aser CSNE general secretary, Indranil Baruah-i anküp tepela o jembi.