Nagaland nung candidate 535-i ULB elections nung tokteptsü

Kohima, January 11 (TYO): Naga People’s Front (NPF), BJP, Congress aser Independent candidate ajak agi parnok 535-i February 1, 2017 nü Municipal aser Town Council elections nung tokteptsü.
Nagaland nung tetsür nem shilem 33 lemzüktsüba anema kin ajaki ama nokdangaka, Hombar tashi tetoktepnürtem tenüng agütsütsü atema anogo agütsü. Tenüng agütsüba mapang nung candidate parnok 558-i tenüng agütsü aser parnok rongnung NPF nungi 268, Congress nungi 31, BJP nungi 79 aser Independent 180 liasü.
Ajisüaka, State Election Commission-i candidate temi agütsüba temetettsü aser kulitem tendanga reprangba sülen, tokteptsü temsüa lir ta asüba candidate tem- NPF nungi 255, Congress nungi 28, BJP nungi 78 aser Independent 174 shimogo.
State Election Commission-i Dimapur MC, Peren TC aser Zunheboto TC nungi candidate pezü (NPF, BJP aser Independent kaka) tenüng agien aser Dimapur nungi NPF candidate kati pa sasa tenüng meyipa agi.
Council ajak agi 32 nung municipal council 3 aser town council 29 dena lir. Ajisüaka, council 6 nungbo tetokteper shinga mali. Item tesemtem nung kin teloktemi Returning Officer’s office mokdanger tetokteptsüpurtem shinga tenüng magütsüdaktsü.
Tetokteper ka danga malibaji Kohima aser Mokokchung Municipal Council tem den Medziphema, Changtongya, Tuensang aser Mon Town Council tem lir.
Tetokteptsüpurtemi January 17, 2017 tashi nung tenüng agientsü akok aser election agitsü süra February 1, 2017 nü agitsü.
Tetsür nem shilem lemzükja ULBs elections aginungbo, India Linük Temzüng Arrla 371 (A) nung Naga nunger nem agüja aliba temetentem ajembangtsü ta tsübua mezüngbo Naga Hoho aser Eastern
Nagaland Public Organisation (ENPO)-i anir ola adok.
Ajisüaka, kin telok balalai iba elections magidaktsütsü ta ola adoka nokdangba maparen tuluba küma inyaka aoba sülen NH aser ENPO nati pei pei kin sasep nung iba onük asoshi telemtetba agiang ta metetdaktsü.
Tetsür nem shilem magütsütsü ta tatem tashi nokdakba teloktemji Angami Public Organisation, Ao Senden, Chang Khulei Setshang (CKS) aser Tuensang Village Citizen Union tem liasü aser parnoki pei pei lushi nung tetoktepnür shinga nema tenüng magütsüdaktsüi nokdangogo.
Mon district nungbo Chi and Mon Town Land Owners Association-i State sorkar aser Land Owners tsüngda 1964 Agreement nung saru noklang nung shilem 50 ali kibur nem agütsütsü ta tenangzüktep agiba ama mapa meinyak tashi elections magidaktsütsü ta nokdanga liasü.
Tanüngba council tem nung tetoktepnürtemi tenüng agüja liaka, Chakhesang, Lotha, Sumi aser tanga kintemia Angami aser Aor den dena pei pei candidate tem dang tenüng meyipa agitsü mesüra kin nungi jentoktsü ta tetuyubatem agütsüogo.