Nagaland nung ‘Child Rights Week’ ayongzüka among

Kohima, Yimpoksüi/November 21 (TYO): Child Protection Services, Department of Social Welfare-i ayongzüka hopta piyong Child Rights Week monga arur tembangba sentong den International Child Rights Day sentong yashi (November 20) nü Ozone Café, Kohima nung ayongzüka agiogo, ta ketdangsertem osang ka ajanga metetdaktsü.
International Child Rights Day anogomong nung Photography Competition sentong nung jembidang Social Welfare Department Director, T Merangtsungba Aier-i, tarnurtem dak tim mesüi benshiba, tanur shibelenba aser tanur sendokba nungi tanurtem kümzüktsüji nisung ajak teinyaktsü mapa lir, ta metetdaktsü.
Social Welfare Director-i, National Crime Record Bureau ajanga ashiba agi, anogo shia tanur 150 shi samar aser juvenile (arishi küm 18 ser tekübok tanurtem) sendokba kanga bulur, ta ashi.
Iba dak sendakba nung pai, tanurtem dak sendakba tebilemtsü onüktem nung nübur nem awareness agütsütsü kanga rongdak nüngdaka kümogo, ta ashi.
“Lokti nung ajaki tanurtem temeden balala kümzüka ayutsü atema lemsateptsüla, aser tanur dak tim mesüi benshiba mesüra tanur sendokba osangtem tim ketdangsertem nem metetdaktsütsüla, ibaji ajanga tanurtem jenjang ajungtsü,” ta pai ashi.
Kasa sentong nung Child Protection Services Director, Chubainla Jamir-i, tanurtem dak azü-aponga benshiba mapatem ajemdaktsütsü atema department-i mapatong aika inyakogo, aser hopta piyong Child Rights week amongdang Department-i child care institutions 42 aser school 27 semdangogo, ta metetdaktsü.
Laisa, department-i fund manguba child care institutions 24 jangjaogo aser tanur 364 nem sempet lema agutsüogo, ta metetdaktsü.
Lai ashiba agi, iba dak alia Cradle of Hope tenzüktsüba aser ‘Naga Customary practices of child adoption’ indang kaket ka November 19 nü sayatsüba densema sentong aika agiogo, aser tanü Child Rights Week tembanga photography competition agir.
Photography competition nung takok angurtemji: Category-1 nung arishi küm 18 ser tekübok tanurtem atema ‘childhood’ omen nung takok angurtemji: 1st – Ngunle Lorin; 2nd – Chingi aser consolation sempet angurtemji- Agnlungbo, Kekhrie Tsukru aser Kenyihili Lorin nunger liasü.
Category-2 (open) nung ‘Children of Nagaland in Traditional Attire’ omen nung ajemdaker toktepba nung takok angurtemji: 1st – Akhruzo, 2nd – Wetsokhro aser consolation sempet angurtemji – Keutinggumbe, Vilieme Kuotsu aser Zakie nunger liasü.
Takok angurtem nem senpet den citations agutsü.
Item tetoktepba nung tetendangertemji nüngtugu photographers- M Duolo aser Rokovor Vihienuo na liasü.