Nagaland nung CMO office tulutiba lapok

June 26, 2019 nü Health & Family Welfare, Nagaland Principal Director, Dr. Vikeyie Losu-i Chief Medical Officer Mokokchung ki tasen lapoktsüba sülen agiba noksa angur.

Dimapur, June 26 (TYO): June 26, 2019 nü Mokokchung nung Chief Medical Officer (CMO) office lapokogo.
Health & Family Welfare, Nagaland Principal Director, Dr. Vikeyie Losu-i iba ki tasen lapokja liasü. Osang angazükba agi Nagaland nung CMO office tulutibaji iba ya lir.
Mokokchung nung doctor tem aser Medical staff tajung lir anungji district nung alirtemi ajangzüktsüsa mapa inyaktsü ayongzüker, ta Principal Director (PD) Luso-i tanü o jembidang ashi.
Küm shia sentong tasentem atonga inyaker aser asenoki itemji tayongzüba ama agizüka inyaktsüla. District kübok meta talang pilar alirtem ajangzükdaktsütsü atema asenoki inyaktsüla ta paisa ayongzük.
CMO office tasen yangluba den külemi District Hospital (IMDH) ya tajungba küma ajungkettsü asoshi mapa inyakdar. Tarutsü anogotem machine tem tajungba akümtsü aser ki tasentem yangluloktsü, aser ibaji district nung alirtem atema tajangzük tulu asütsü, ta Principal Director-isa ashi.
Sentong nungsa District Administration tenüng nung jembidang SDO (C) Mokokchung, Thungchanbemo Tungoe-i “staff temi office building kanga junga anepalutsüla. Asenok ya sorkar lir aser iba kiojen ya asen meyong. Anungji nisung ajaki pei indang ama office kümzüka ayutsüla” ta ashi.
Sentong nung mendenji Medical Superintendent, IMDH, Dr. P. Medemmayang liasü, MTBA Pastor Rev. Ponen-i temoatsü meshia sarasadem, Ao Senden Tatong Tir-ia o tatsüka jembi aser Dy. CMO, Dr. Kibangkumba-i anküp tepela o jembi.