Nagaland nung Coffee Roasting Machines lema agütsü

Kohima, Fberuary 16, 2024 (DIPR): February 16, 2024 nü Directorate of Land Resources nung Coffee Roasting Machines program agiogo.

North Eastern Council (NEC)-i teyari agüja inyakba mapa lapokba sentong nung Land Resources Advisor G. Ikuto Zhimomi aden.

“Nagaland nung coffee lu ayimba ya 1970s nungi tenzük aser tanü ano iba mapa asentenshia tenzüker. 1990s tatemlen ka iba industry tejakleni moutettsüsa aküm saka 2014 küm Department of Land Resources-i tanaben tenzüktsü” ta Advisor Ikuto-i ashi.

Iba ajanga North Eastern region nung coffee lu ayimba tsütsü Nagaland ya jenjang temapur rongnung dena lir, ta pai ashi.

“Nagaland ya coffee kanga tsünütetba tesem ka akümtsü lenmang lir. Coffee lu ayimba yagi tekong lu ayimba melenzüktettsü aser Brazil, Vietnam, Colombia o Ethiopia ama coffee aika tsünütetba tesemtem ama akümtsü” ta Advisor-isa ashi.

“Commissioner Secretary Land Resources-i aluyimertem yariba atema tenüngsang agütsür aser department-i areca nut, coffee aser rubber lu ayimertem maneni yaritsü nangzüker. Chief Minister Rio-i aluyimertem yaritsü nangzüka inyaker aser tarutsü anogotem tajung asütsü” ta Ikuto Zhimomi-isa ashi.

Iba sentong nung Zakietsono Jamir – Dimapur; R. Lichanbemo Humtsoe – Kohima; Tiakum Kichu – Mokokchung; Nsungthung V. Ngullie – Kohima; Thejanuo Kets – Kohima; Boholi Chishi – Dimapur aser Kekhriengulie- Kohima nunger nem Coffee Roasting Machines agütsü.

Sentong nung Land Resources Director Albert Ngullie-i tesentepertem ajak pelaa agizük aser Nagaland nung coffee lu ayimba renloka aruba osang lemsatep.

“Coffee Board of India aser NEC külemi Nagaland nung coffee lu ayimertem yariba atema kanga pelar” ta Albert Ngullie-i metetdaktsü.