Nagaland nung Congress candidate atema nüboyim tenzükogo

Dimapur, March 27 (TYO): Tanü linük nung nübortemi BJP anema noktaker anungji taruba election nung Congress posema nungittsü ayongzüker, ta NPCC President K. Therie-i ashi.
Tanü Toulazouma Village nung public sentong ka nung o jembidang NPCC President-i ashiba agi, “secularism aser tamangba yimsü nüjiso kümzüka ayutsü, CAB anema noktaktsü aser Naga yimten tebilemtsü asoshi inyaktsü atema taruba elections nung kasa tangatetba aliba political party temi Congress yaritsü mepishir.”
KL Chishi ya aika ajangshia aruba aser lennir tejen ka lir. Pa ya ajaki mulungba candidate ka lir aser anogo ishika tsüngda joint declaration ka agütsütsü, ta paisa ashi.
Congress President Rahul Gandhi-ia April 3, 2019 nü DDSC Stadium Dimapur nung public rally ka nung o jembitsü, ta K Therie-isa metetdaktsü.
Nagaland nung miimmechi maparen kanga inyaker aser nübortemi ochi obendang aginür. India Constitution nung ‘Secular’ ta asüba tangatetba mesamadaktsütsüla aser Centre nung BJP sorkar nem tanaben sorkar kümdaktsüra, ‘Secular’ agientsü ana nung lir, ta paisa ashi.
BJP President Amit Shah-i Guwahati nung BJP sorkar tanaben kümra Parliament house anaprong nung CAB benoka agizüktsü ta nangzükogo. Ibaji RSS-BJP-i North East nung lisopurtem samatsütsü atema tasa atongba takok ngudaktsüba asütsü, ta NPCC president-isa shisem.
“Congress-i tesüiba mapang inyakba ama political solution agütsütsü. Talisa asenoki National Political Party ka nungi MP ka yoktsüla kechiyong iba ajanga MP jagi Parliamentary Party ka nung shilem agia maongkatem angutsü. Yamaji atalokra Parliament nung MP-i o jembitsü atema mapang peria angutsü aser külem MP temi posema nungittsü” ta paisa metetdaktsü.
K Therie-isa tesentepertem dang loktiliba tasen ka yangertsü atema Congress candidate KL Chishi nem vote agüjang ta mepishi.
Sentong nung taoba INC candidate Khekiye K. Sema (IAS) Retd-ia o jembidang, rara ya BJP aser INC tangatetba tsüngda lir ta ashi.
Linük ajungai tamangba yimsü nüjiso ngua liasü saka Centre nung BJP sorkar akümba sülen iba nüjiso alenbangogo aser Khristantem aser telok tilatem dak tashiyim mapa inyaker. RSS-BJP teloktemi Constitution nung ‘secular’ olong melennür aser Hindutva tangatetba Uniform Civil Code (UCC) latetnür, ta Khekiye K. Sema-isa shisem.
BJP-i tanaben sorkar kümra Parliament house anaprong nung CAB agizüktsü. Nagaland nung ILP maparen takok ngua meinyaketer saka tanü state sorkari par tanishirtem peladaktsütsü atema Arrla 371(A) aser ILP tenüng amshia mapa inyaksangshir, ta paisa metetdaktsü.
Jammu & Kashmir nem tashi agütsüba Arrla 370 agientsü tebilemba lir aser BJP sorkar tanaben kümsük atema sorkar kümra iba ya mapa küma inyaktsü. Parnoki Nagaland atemaa Arrla 371(A) agientsü aser iba ajanga UCC atema lenmang sadema lapoktsütsü, ta Khekiye-isa shisem.
Tesüiba küm pungu tsüngda BJP-i kodanga mangashidangba mapa tamajungtem inyakogo aser 2019 Lok Sabha elections nung parnokisa takok ngura, tamangba yimsü tsütsü Hindutva amentetba dang masü saka sorkar ketdangsübaren, shisaliok aser rongsenkettsüng nunga Hindutva amenoktsü, ta paisa tebilemtsü ka lemsatep.
Iba sentong nung taoba NPCC President, Minister aser District Election Campaign Committee indang Convener SI Jamir aser taoba INC candidate Lun Tungnung natia o jembi.
Sentong nung mendenji VP, DCC Dimapur, Neipete Therie liasü, Executive Member, DCC Dimapur Kakishe Chophy-i tesentepertem pelaa agizük, Secy. DCC Dimapur Ajit Gogoi-i ken ka aten aser Secy. DCC Dimapur Lipok Longkumer-i anküp tepela o jembi.