Nagaland nung Congress-i taruba sorkar tentettsü

Kohima, July 5 (TYO) : 2018 Assembly elections sülen Nagaland nung Congress sorkar arutsü tanü Nagaland Pradesh Congress Committee (NPCC) President, K Therie-i metetdaktsü.
Mongulbarnü Congress Bhavan, Kohima nung sentong ka agiba sülen osangbener den sensaksemdang, Therie-i ashiba agi, 2018 state elections nung Congress-i tangar telok teyari magii dang tokteptsü.
“Tang sorkar ketdangsüa inyaker Naga People’s Front (NPF) den tokteper telokji NPCC dang asütsü, kechiyong tanga yimten teloktemi parnok den metokteptettsü. Onoki (NPCC) mashi mapang ka nung election nung tokteptsü renema lir,” ta paisa shisem.
NPF-i aniba DAN sorkar kümsükji February 2018 tashi lir.
Congress nung anentsürtemi tawa Nagaland Congress ta ser telok tasen ka tentetba ajanga tetsükdaktsü ajurutsü asü koda ta osangbenertemi asüngdangdang, Therie-i iba telok ajanga NPCC nem timtem kecha bener marutsütsü ta langzü.
Nagaland Congress tentetba ajanga 2018 elections nung NPCC candidate tem indang vote nung timtem ajurutsü tarendakba ali asü mali ta osangbenertemisa asüngdangdang, NPCC nung Assembly Constituency Congress Committee (ACCC) ajak akangakanga lir, ta Therie-i ashi.
“Congress nungi anenja alir lennirtemi party tasen tenzükba sülen ACCC shingaia parnok sülen manidak” ta paisa shisem.
BJP-i North East nung non-Congress teloktem longjemtsü atema North East Democratic Alliance (NEDA) tentetba atema asüngdangdang, “North East nung Lotus (BJP) mapongtsü” ta NPCC Tirisa langzü.