Nagaland nung Constitution Day amung

November 26, 2018 nü Raj Bhavan Kohima  nung Nagaland Chief Secretary R. Binchilo Thong, IAS-i Constitution Day  indang tenangzükba agidaktsüdang tangokba noksa angur.

Dimapur, Yimpoksüi (November) 26 (TYO): November 26, 2018 nü Raj Bhavan Kohima nung Constitution Day ayonga amung. Constitution of India agizükba bilemteta iba anogo amunger aser Nagaland Chief Secretary, R. Binchilo Thong, IAS-i tenangzükba agidaktsü aser okila jembi.
Preamble nung linük alizüng aser teinyaktsütem enoka lir aser iba ajanga Indian Constitution kümzüka ayur. Asen lima nung ozüng tongtibaji Constitution of India lir, ta Chief Secretary-i ashi.
Sentong nung High Court Bar Association President, Ashiphri Zho-i o jembidang Indian Constitution ya India nung alir ajak atema tongtipang lir. “Indian Constitution ya nübortem atema ozüng tematiba aser senso shia indang nüjiso agütsür” ta paisa shisem.
Sentong nungsa Senior Additional Advocate General, T.B. Jamir-i Constitution Day amungba osang lemsatepdang “2015 matong tashi November 26 ya ‘Law Day’ ta ser amung saka sorkari Constitution Day ta ser amungtsü lemtet” ta ashi.
Home Commissioner and Commissioner & Secretary to the Governor, Ramakrishnan, IAS-i anküp tepela o jembidang Nagaland Governor P.B. Acharya dang pelaba metetdaktsü.
Sentong nungsa Law and Justice Advisor, Dr. Longrineken, Administrative Head of Departments, Head of Departments aser telok balala nung teshimtet nübotem aden.