Nagaland nung contractor temi sorkar den yariteptsüla

Kohima, July 29 (TYO) : Nagaland nung contractor temi sorkar den teka amteper state nung alirtem nem infrastructure tajungba agütsütsü merangdi, ta Housing Parliamentary Secretary, Levi Rengma-i tanü ayongzük.
Bodbarnü nikongtsütsü Nagaland Government Registered Class-1 Contractors’ Union sentong nung Levi Rengma-i ashiba agi, linük den medemdangra Nagaland nung azüngtsü-zülutsü metetba jenjangbo kanga tajung saka asenok rongsenren aser infrastructure tsütsübo tangar memenep.
Contractor temi construction industry indang technology tasentem metettsüla, ta paisa ashi.
Chief Minister T.R. Zeliang New Delhi nung oa aliba agi iba sentong nung medentet aser Levi-i T.R. Zeliang indang osang zünga metetdaktsü.
“Asen state nung terenlok atema inyakba maparen nung contractor temi shilem tulu agitsüla. Sorkari sentong tajung atongtsü akok saka mapaji contractor temi dang inyaktsü” ta TR Zeliang-i ashi.
“Infrastructure dak sendakba mapaji jungjunga meinyakra, takoksa dang lir. Anungji contractor temi mapa tajungtiba nung inyaktsüla. Nagaland nung kisüjensüba mapaji tsümartemi dang inyaker. Parnok formal education, degree mesüra diploma kecha mali saka inyaka shizükba dang lir. Anungji iba jagi Nagaland nung quality construction mali” ta chief minister-isa ashi.
Nagaland nung engineer aser contractor temi mapa inyakba tesem mapang shia semdangtsüla aser akokba tashi mapa inyakba ketdangsüa reprangtsüla, ta paisa shisem.
Chief Minister-isa Nagaland nung contractor telok ana – Nagaland Contractors & Suppliers Union (NCSU) aser Nagaland Government Registered Class-1 Contractors’ Union (NGRC-1 CU) telemsa aliba atema khuret abenba metetdaktsü aser pai ashiba agi, telok anaji ka küma longjem nungbo sorkari contractor tem asoshi mapa tajungba inyaktettsü.
Tanü agiba sentong nung Agriculture Parliamentary Secretary, Dr. Benjongliba aden aser mendenji NGRC-1 CU tatong tir S. Bendang Jamir liasü aser NGRC-1 CU tir Seyiekuolie-i tesentepertem pela agizük.
NBCC general secretary Rev. Dr. Z. Keyho-i temoatsü meshia sarasadem, Naga Idol
2007 Ruokuovotuo Pfiisenuo-i ken ka aten aser NGRC-1 CU tongti tezülur L. Pukhato Shohe-i anküp tepela o jembi.