Nagaland nung cooperative movement tashimait : Litrongla G Chishi

Kohima nung 63 buba All India Cooperation Week Celebration sentong nung Secretary, Litrongla G Chishi-i o jembiba noksa nung angur.

Kohima, November 20 (TYO) : Agri Department nungi Cooperation Department balaka razüka aoba sülen küm 51 süia aruaka asen state nung cooperative movement terenlok mali, ta Secretary for Cooperation, Government of Nagaland, Litrongla G Chishi-i ashi.
Honibarnep Registrar of Cooperative Societies, Kohima indang office nung 6 buba All India Cooperation Week Celebration sentong nung Litrongla-i iba ya metetdakja liasü.
Nagaland nung department aser society temi mapa shitak meinyakba ajanga terenlok mali, ta laisa ashi.
Kümshia India nung Cooperation Week ayongzüka amunger aser iba mapang public nem Cooperation movement tali meteta lidaktsütsü atema mapa balala inyaker.
Nagaland nung Cooperation Department-i nübortem department indang mangdang aser alizüng meteta lidaktsütsü atema tim mapa inyaker asü masü ta Litrongla-isa asüngdang.
“Naga nunger sobaliba aser inyaksangshitemji cooperative society ka mesüka lir, kechiyong Naga nunger takümji lokti den sendaktepa lir. Asenok dak amalitepa aliba tangatetba liaka, asenoki cooperative society jangjajangja memetetba agi asen loktiliba tejakleni maoer” ta lai ashi.
Cooperative society ya NGO ka masü saka rongsenren dak sendakba telok ka lir aser pei indang nija bank lir. Ajisüaka, Nagaland nung cooperative society mapa shitak meinyaktetba ajanga tamakok angur, ta laisa metetdaktsü.
Iba sentong nung mendenji Assistant RCS, Anthony N Yhome liasü, DRC & CEO, NSCU Temjen Longkumer-i okila jembi aser Project Officer, NCUI, Kohima, Ketholenuo-oi anküp tepela o jembi.
Sentong nungsa Vüngi Women Thrift & Credit Cooperative Society, Kohima aser Vision Women Weaving, Handloom & Handicraft Cooperative Society, Kohima züngsemtemi ken ka ka aten.