Nagaland nung Covid 19 agi shiranger mali

Dimapur, February 18 (TYO): Nagaland nung Covid 19 (corona virus) agi shiranger ka danga mali aser iba khuret atema renema lir, ta Health & Family Welfare Minister, S. Pangnyu Phom-i ashi.
Mongulbarnep Dimapur nung par kidang osangbener den jembidang Pangnyu-i ashiba agi “Nagaland nung surveillance & rapid response team ajak saksalema alitsü tetuyuba agütsüogo.”
February 7, 2020 nü Ministry of Health & Family Welfare-i Covid 19 atema lapokba special surveillance system portal nung Nagaland-i osang sangoktsüdar, ta paisa ashi.
China aser Covid 19 agi kongshia aliba linüktemi aoer nisung 94 tashi reprangdar aser parnok rongnung nisung 15 tashi home isolation nung lir aser department-i parnok reprangdar, ta Minister Pangnyu-isa shisem.
February 18, 2020 tashi nung, alima nung nisung 73,304 dak Covid 19 aliba putetogo aser nisung 1872 süogo. 12572
Deputy Director & State Nodal Officer (IDSP), Dr. Nyan-ia ashiba agi “China nungi aruba osettem ajanga virus menatepba indang kuli tejangja mali, aser virus ya tema nung mapang talangka malir.”
Dimapur nung yipten 25 dena sorkar hospital aser military hospitals indang isolation wards nung yipten 52 tashi renema lir, ta paisa ashi.